Kòrsou i Sürnam ta profundisá nan kolaborashon pa fortalesé Justitiële Jeugdinrichting Curaçao (JJIC)

Willemstad, [31 yüli 2026] – Ministerio di Hustisia di Kòrsou i Ministerio di Hustisia i Polis di Repúblika di Sürnam a firmá un adèndum relashoná ku e akuerdo di kolaborashon tokante Twinning riba tereno hudisial, firmá na 16 di yanüari 2025. Ku e adèndum aki, e asignashon temporal di kuater empleado eksperensiá di sistema penitensiario di Sürnam na Kòrsou (JJIC) ta keda formalmente stipulá.

E kolaborashon ta suprayá e relashon históriko i kultural estrecho entre Kòrsou i Sürnam i ta konfirmá e konvikshon kompartí ku paisnan den nos region por fortalesé otro dor di kompartí konosementu, eksperensia i ekspertisio. E yudansa temporal di e profeshonalnan for di Sürnam tin komo meta transferensia di konosementu, fortalesimentu di kapasidat i desaroyo kontinuo di e kalidat di guia i seguridat den JJIC. E asignashon lo tin un durashon di tres luna.

Promé Minister Gilmar Pisas, kende a firmá e adendum na nòmber di Minister di Hustisia Shalten Hato, a enfatisá e balor di e kolaborashon:

“E relashon entre Kòrsou i Sürnam ta basá riba konfiansa mutuo, balornan kompartí i un responsabilidat komun pa un komunidat sigur i hustu. E kolaborashon aki ta mustra ku paisnan karibense por sostené otro ku konosementu, eksperensia i profeshonalismo. Nos ta hopi agradesido na e Ministerio di Hustisia i Polis di Sürnam pa nan disposishon di pone empleadonan eksperto disponibel i nos ta mira esaki komo un invershon den e profeshonalisashon kontinuo di nos institushonnan hudisial.”

E adèndum ta sigui traha riba e akuerdo di Twinning eksistente i ta kontené akuerdonan spesífiko tokante ehekushon i evaluashon di e proyekto aki. Na mes momentu, e responsabilidat atministrativo i operashonal pa JJIC ta keda kompletamente na Kòrsou.

E kolaborashon aki ta kai den e ambishon mas amplio di Kòrsou i Sürnam pa sigui fortalesé kolaborashon regional riba tereno di hustisia. Ámbos pais ta rekonosé ku desafionan sosial i di seguridat, ku ta bira kada biaha mas kompleho, ta pidi asosiashonnan duradero, unda sosten mutuo i interkambio di konosementu ta kontribuí na institushonnan fuerte i prepará pa futuro. E manera di traha aki ta mustra un linea fuerte i ta duna inisiativanan regional anterior, den kua Sürnam tambe a pone ekspertisio i personal disponibel pa otro paisnan karibense fortalesé nan sistema penitensiario.