Ishahier Monte, parlamentario pa MFK: Konfiansa di pueblo ta kuminsá ku transparensia

Ishahier Monte, parlamentario pa MFK:
Konfiansa di pueblo ta kuminsá ku transparensia

​
Parlamentario Ishahier Monte di frakshon Movementu Futuro Kòrsou (MFK) a hasi uso di su derechi di pregunta segun artíkulo 96 di Reglamentu di Òrdu pa pidi klaridat i transparensia di Minister di Finansa tokante e implementashon di e oumento di AOV, e pago di e lumpsum na kobradónan di ònderstant, i tokante e progreso di e trayekto legislativo pa formalmente integrá e medidanan aki den legislashon vigente.
Segun parlamentario Monte, e tema aki no ta trata solamente di sifranan òf pago, sino di un asuntu ku tin un relevansia sosial profundo. Pa hopi penshonadonan i kobradónan di ònderstant, AOV i sosten finansiero di gobièrnu ta representá nan fuente prinsipal — i pa algun hende, asta nan úniko fuente — di entrada.
Den e klima ekonómiko aktual, kaminda kosto di bida i gastunan diario ta subi konsiderablemente, e oumento di AOV i e lumpsum di XCG 100,- tin un impakto direkto riba bienestar, dignidat i forsa di kompra di e gruponan mas vulnerabel den nos komunidat.
For di un punto di bista sosial, e medidanan aki tin un peso grandi. Ora gobièrnu tuma un desishon pa duna alivio finansiero na penshonadonan i kobradónan di ònderstant, e implementashon di esaki mester sosodé di manera kla, hustu i ordená. Klaridat i konfiansa den e proseso ta fundamental,” asina parlamentario Monte ta indiká.
Sr. Monte ta enfatisá ku ta importante tambe pa wak e manera kon e medidanan ta wòrdu implementá i kontrolá. Un proseso di pago ku no ta kla, ku tin retraso òf ku no ta yega na tur benefisiario ku tin derechi riba dje, por miná konfiansa di pueblo den e institushonnan públiko. P’esei, den su preguntanan na minister, sr. Monte ta pidi klaridat tokante kon e proseso di pago a wòrdu organisá i ehekutá, kuantu penshonadonan a risibí e oumento di AOV, kuantu kobradónan di ònderstant a haña e lumpsum, i si tin kasonan pendiente òf ku tin problema ku pago.
Tambe parlamentario Monte ta pidi klaridat tokante e progreso di e trayekto legislativo pa formalmente integrá e oumento di AOV den legislashon vigente, i tokante e timeline ku gobièrnu tin pa finalisá e proseso legal.
“Pueblo mester por tin seguridat ku promesanan sosial no ta keda solamente na palabra, sino ku nan ta wòrdu realisá di manera hustu, transparente i sostenibel,” asina sr. Monte ta deklará.
Ku esaki sr. Monte ta sigui boga pa protehá bienestar di nos penshonadonan, kobradónan di ònderstant i tur grupo vulnerabel den nos komunidat, i lo sigui insistí riba bon gobernashon, kontrol efektivo i responsabilidat den maneho di fondo públiko.

Ishahier Monte
Parlamentario pa
Frakshon di MFK