Ubuntu a trese historia, ritmo, baile i konekshon na  Landhuis Kenepa 

 

Ubuntu a trese historia, ritmo, baile i konekshon na  Landhuis Kenepa 

WILLEMSTAD – Riba djadumingu 9 di ougùstùs, Fundashon Museo Tula a organisá Ubuntu na Landhuis Kenepa, komo e promé aktividat den e seri di aktividat bou di Vlam di Libertat  2026. Durante e dia, partisipantenan a haña oportunidat pa siña, eksperensiá i reflehá riba  diferente aspektonan di nos historia, kultura, resistensia i konekshon ku otro. 

Portanan a habri pa 10or di mainta, i alrededor di 11or e programa a kuminsá ku un interkambio  interaktivo tokante ‘Kiko ta libertat’, presentá pa Sheedia Jansen. El a kuminsá ku un splikashon  di e konsepto di Ubuntu, e filosofia Afrikano ku ta pone énfasis riba e konekshon entre hende i  komunidat: “Mi ta, paso nos ta”. E konsepto no a keda solamente na teoria. Den un momento  interaktivo, a invitá esnan presente pa pone Ubuntu na práktika, saludando otro ku un brasa.  Esaki a yuda kreá un ambiente di konekshon i partisipashon. 

E dia a sigui ku e charla “Ritmo- i Ritonan Kongo” bou di guia di Vernon Chatlein. Durante e  charla, Chatlein a duna splikashon tokante e ritmonan i nan konekshon ku nos kultura lokal. E  parti musikal a wordu kompañá pa músikonan ku a toka tambú i chapi, dunando e  partisipantenan un eksperensia mas direkto ku e ritmonan i zonidonan. 

Seguidamente, Ronald Pieters a duna un demonstrashon di diferente pasonan di baile durante e  seshon “Wantaduru: Baile di Muraya di Resistensha”. Presentenan no solamente a wak e  demonstrashon, sino nan mes a haña oportunidat pa siña un koreografia simpel. E koreografia aki  lo bini bèk komo parti di e programa durante Vlam di Libertat, djasabra 15 di ougùstùs, kreando  asina un konekshon entre e eksperensia di Ubuntu i e seremonia final. 

E dia a kontinuá ku e charla “Obhetonan di Protekshon”, presentá pa Vernon Chatlein. E charla a  duna partisipantenan mas informashon riba obhetonan di protekshon den konteksto di kultura i  tradishon. 

E seri di evento ta sigui riba djaweps 13 di ougùstùs ku UHURU, for di 7:00 pm pa 9:00 pm na  Landhuis Bloemhof. Uhuru ta un seminario tokante Afro-spiritualidat relashoná ku lucha i  resistensia, bou di guia di Mara Leti i Bob Harms. 

Djasabra 15 di ougùstùs e seri di evento ta yega na su final ku Vlam di Libertat na Landhuis  Kenepa, for di 10:00 pm pa 1:00 am. Porta ta habri for di 8:00 pm ku pelikula tokante di Tula  riba pantaya. Grupo Isoko lo duna un show ku Mara Letí komo artista invite. E anochi lo sigui ku un seremonia musikal kombiná ku un kaminata pa yega na e punto sentral kaminda lo sende e  Vlam di Libertat. I pa finalisá Grupo Sablika lo sera e anochi.  

Fundashon Museo Tula ta invitá komunidat pa inskribí pa partisipá den e próksimo aktividatnan riba e website http://www.fundashonmuseotula.com of manda un mail na 

info@fundashonmuseotula.com. Pa esnan ku ta deseá hasi uso di transpòrt pa Vlam di Libertat,  transpòrt lo sali for di SVB Otrobanda 8:00 pm.