Konseho di Minister ta risibí ‘Deskundigengroep democratisch tekort Koninkrijk’

Willemstad- Riba djárason, 12 di ougùstùs 2026, Konseho di Minister a risibí e ‘Deskundigengroep democratisch tekort Koninkrijk’ pa un kombersashon profundo tokante nan investigashon. E grupo, presidí pa dr. Aubrich Bakhuis, a risibí e mandato di Konsulta Interparlamentario di Reino pa identifiká i analisá proposishonnan pa redusí e défisit demokrátiko den Reino. Konforme planifikashon lo presentá e resultadonan na yanüari 2027 durante di e konferensia di IPKO na Sint Maarten.

Komo preparashon riba e kombersashon, Konseho di Minister a trata e preguntanan por eskrito di e grupo di trabou, ku a ser diskutí mas aleu i suplementá durante di e kombersashon.

Promé Minister Gilmar Pisas na nòmber di e Konseho di Minister a deliniá diferente posishon i puntonan di atenshon for di Kòrsou. Konseho di Minister ta ekspresá apresio pa e trabou di e grupo di eksperto i ta spera ansiosamente riba resultadonan di e investigashon i rekomendashonnan, sperando ku esakinan lo kontribuí na pasonan konkreto ku lo sigui den Reino.

Den representashon di e grupo di eksperto tabata presente dr. Aubrich Bakhuis i mr. Johan Sjiem Fat. Dr. Rachilda Arduin i Sekretario mr. Gytha Boerwinkel a partisipá di forma virtual. Profesor dr. Leonard Besselink no por tabata t’ei presente. Huntu ku e ministernan i Sekretariado di Konseho di Minister, sr. Caryl Monte i sr. Miguel Jackson tambe tabata presente komo ekspertonan lokal i asesornan di Konseho di Minister.