Kòrsou ta lansa “Tourism & Health Program” pa protehá salubridat i fortalesé turismo
Den kolaborashon ku CARPHA,
Kòrsou ta lansa “Tourism & Health Program” pa protehá salubridat i fortalesé turismo
Willemstad – Kòrsou a pone un paso importante awe ku e lansamentu ofisial di e “Tourism & Health Program (THP)” pa Kòrsou. E programa ta pone salú públiko i turismo mas serka di otro, ku e meta pa protehá salú di residente i bishitante, mientras Kòrsou ta sigui desaroyá su sektor turístiko di un manera sigur i sostenibel.
E lansamentu ta forma parti di un proseso di kolaborashon entre sektor di salubridat, i sektor di Turismo, “Caribbean Public Health Agency” (CARPHA) i otro partnernan públiko i privá. Durante e programa, diferente stakeholder a reuní pa kompartí konosementu, fortalesé kolaborashon i traha riba un sistema mas prepará pa detektá i respondé na posibel menasanan pa salú públiko.
Turismo ta krese, i ku esaki tambe e responsabilidat pa protehá salú di bishitantenan di nos isla. Segun sifranan di “Curaçao Tourist Board” (CTB), turismo na Kòrsou a krese konsiderablemente despues di e pandemia di COVID-19. Durante 2025, alrededor di 788.000 turista di estadia a bishitá Kòrsou. Te ku luna di yüni 2026, alrededor di 515.000 pasahero di krusero ya a bishitá nos isla.
Pa un isla ku un poblashon di aproksimadamente 158.000 habitante, e kantidat grandi di bishitante internashonal ta trese benefisiosonan importante pa ekonomia i empleo, pero tambe ta krea un reto pa salú públiko. Turista ta yega for di diferente region di mundu, inkluyendo Oropa, Nort- Amérika i Sur- Amérika, i ku kada bishitante tin tambe un posibel riesgo pa introdukshon i propagashon di malesanan infeksioso.
Un malesa infeksioso ku yega un isla chikí por propagá relativamente rápido i tin konsekuensia no solamente pa salú di e poblashon i bishitantenan, sino tambe pa e sistema di kuido di salú i pa e ekonomía.
Preparashon i detekshon tempran ta esensial
Kòrsou a eksperensiá anteriormente e riesgo di introdukshon di malesanan infeksioso relashoná ku turismo. Promé ku e pandemia di COVID-19, Kòrsou mester a tuma akshon rápido despues ku un turista den un hotèl a resultá positivo pa Sarampi. Mas resien, un miembro di tripulashon di un barku a resultá positivo pa Sarampi i a keda aislá riba e barku na momentu ku a yega na Kòrsou.
Sarampi por ehèmpel ta propagá su mes ainda na diferente parti di mundu i p’esei ta nesesario pa Kòrsou permanesé alerta. Tambe tin otro malesanan infeksioso i
malesanan transmití pa vektornan ku por representá un menasa. Esei ta mustra kon
importante ta pa tin un sistema ku por detektá menasa tempran, kompartí informashon rápidamente i kordiná un reakshon efektivo.
Salubridat i turismo ta bai man den man
E “Tourism & Health Program” ta yuda Kòrsou fortalesé kontròl i sistemanan di alerta, mehorá interkambio di informashon i stimulá un kolaborashon mas fuerte entre salubridat i turismo. E prinsipio ta simpel: un destino ku ta salú, prepará i kapas pa respondé rápidamente riba menasa di salubridat públiko ta un destino ku ta duna konfiansa na su habitantenan, bishitantenan i partnernan internashonal.
Promé Minister sr. Gilmar Pisas a enfatisá ku turismo i salubridat ta inseparabel. Mas turismo ta kontribuí na mas entrada di divisa i desaroyo ekonómiko, pero un brote di un malesa infeksioso por tin un efekto negativo riba turismo mes. P’esei, un bon kordinashon entre salubridat, turismo i sektor privá ta fundamental.
E “Tourism & Health Program Curaçao” ta representá un kompromiso pa sigui traha huntu pa un Kòrsou ku por risibí mundu, miéntras ta protehá salubridat i bienestar di su poblashon i tur esnan ku ta bishitá nos isla. CARPHA a wòrdu rekonosé pa su kolaborashon i sosten tékniko, miéntras tambe ta gradisí Ministerio di Desaroyo Ekonómiko, partnernan den turismo i tur stakeholder públiko i privá ku ta kontribuí na e inisiativa aki. E meta ta kla: un Kòrsou salú, prepará i resiliente, kaminda turismo i salubridat ta traha huntu pa sigurá un futuro sostenibel pa nos poblashon i pa nos destino turístiko
