Direktiva di Curacao Cleanup tabata di bishita na Ministerio di Salú, Medioambiente i Naturalesa (GMN). Promé minister sr. Gilmar Pisas, komo e mandario responsabel pa e ministerio, a risibí e delegashon di Curaçao Cleanup.

Motibu di e bishita tabata pa informá tokante e movementu di ‘Green Wave’ tambe ‘World Clean Up Day’ 2026.

Manera ta konosí dos siman pasá a lansa ‘Green Wave’ ku ta un movementu ku segun nos presidente sra. Myrthe George a splika entre otro ta representá e sentido di patriotismo i kambio di komportashon ku ta transformá nos orguyo patriótiko den un responsabilidat nashonal.

Un movementu ku mester sigui krese i ku hinter nos komunidat mester bira parti di dje. E motibu prinsipal di e bishita ta pa invitá Gobièrnu pa bira partner di e movementu importante aki i pa sostené World Clean Up Day Kòrsou 2026.

Curaçao Cleanup ta sumamente satisfecho ku resultado di e reunion i ku orguyo por bisa ku a logra otro partner hopi importante pa forma parti di e movementu di Green Wave.

Direktiva di Curaçao Cleanup ta gradisí promé minister i su delegashon pa nan tempu, disponibilidat i nan kontribushon balioso pa logra un Kòrsou mas limpi i asina mas salú.

Curaçao Cleanup ta konbensí ku huntu nos por logra un kambio positivo, basta nos uni tras di un meta komun!

𝑼𝒏 𝑲𝒐̀𝒓𝒔𝒐𝒖 𝒍𝒊𝒎𝒑𝒊, 𝒔𝒂𝒏𝒐 𝒊 𝒎𝒂𝒔 𝒃𝒖𝒏𝒊𝒕𝒂 𝒑𝒂 𝒏𝒐𝒔 𝒕𝒖𝒓.