Minister Boekhoudt ta dialogá ku direktor di UNOPS tokante sostenibilidat i infrastruktura di salubridat públiko
Salubridat Públiko, Medio Ambiente i Naturalesa
Minister Boekhoudt ta dialogá ku direktor di UNOPS tokante sostenibilidat i infrastruktura di salubridat públiko
Publiká riba 02 Sèptèmber 2026
WILLEMSTAD – Diamars 1 di sèptèmber 2026, Minister di GMN, Tyron Boekhoudt, a risibí Giuseppe Mancinelli, direktor di United Nations Office for Project Services (UNOPS), pa un reünion enfoká riba profundisashon di kooperashon entre UNOPS i Gobièrnu di Kòrsou.
UNOPS no ta un partner nobo pa Kòrsou. E organisashon a kontribuí anteriormente na diferente estudio i proyekto relashoná ku infrastruktura i desaroyo sostenibel. Durante e reünion, Minister Boekhoudt i Sr. Mancinelli a papia tokante oportunidadnan pa sigui ampliá i duna kontinuidat na proyektónan ku tin un konekshon ku e responsabilidadnan di Ministerio di GMN.
Durante e reünion nan a trata entre otro maneho di basurá, awa i sostenibilidad ambiental i oportunidadnan pa UNOPS brindá apoyo tékniko den implementashon di proyektónan prioritario. Maneho di basurá ta un punto di atenshon importante, teniendo na kuenta e kapasidat limitá di landfill Malpais i e konsekuensianan ku maneho inadekuá di basurá por tin pa medio ambiente i salú públiko.
Minister Boekhoudt a enfatisá e importansia di sigui transformá polítika i planifikashon den akshon i proyektónan konkreto. Ministerio di GMN i UNOPS lo sigui eksplorá oportunidadnan di kooperashon pa kontribuí na un Kòrsou mas salú, resiliente i sostenibel.