𝐊𝐨𝐩𝐞𝐫𝐚𝐬𝐡𝐨𝐧 𝐬𝐭𝐫𝐚𝐭é𝐠𝐢𝐤𝐨, 𝐢𝐧𝐭𝐞𝐫𝐤𝐚𝐦𝐛𝐢𝐨 𝐝𝐢 𝐢𝐧𝐟𝐨𝐫𝐦𝐚𝐬𝐡𝐨𝐧 𝐢 𝐤𝐨𝐧𝐞𝐤𝐬𝐡𝐨𝐧 𝐢𝐧𝐭𝐞𝐫𝐧𝐚𝐬𝐡𝐨𝐧𝐚𝐥.

E di dos dia di JVO a start mainta ku reunion di Centrale Stuurgroep, unda representantenan di e diferente paisnan a elaborá riba e.o. kon pa sigui fortifiká koperashon regional i kon pa traha mas estrecho huntu den lucha kontra kriminalidat.

Un di e tópikonan importante tabata desaroyo di kriminalidat regional. Un bista aktual i kompleto di e desaroyonan kriminal den nos region ta importante pa por identifiká tendensianan na tempu, komprondé mihó kon kriminalidat ta move entre nos fronteranan i determiná unda ta nesesario pa aktua konhuntamente.

Kriminalidat no ta stòp na frontera di un pais. P’esei, interkambio adekuá di informashon, análisis konhunto i un bon kordinashon entre e diferente organisashonnan di hustisia ta indispensabel. Ora nos kompartí konosementu, eksperensia i informashon, nos ta fortifiká nos kapasidat pa antisipá mihó riba desaroyonan kriminal i aktua di un manera mas dirigí i efektivo.