Riba djadumingu 6 di sèptèmber, nos ta selebrá Dia di Boneiru. Un dia spesial pa nos isla, kaminda nos ta bini huntu pa selebrá nos kultura, nos tradishonnan i tur loke ta hasi Boneiru spesial.

E aña akí nos ta selebrá un di nos símbolonan. Nos Eskudo ta kumpli 40 aña. Nos Eskudo ta un di e símbolonan ofisial di Boneiru, banda di nos Bandera i nos Himno. Nos Eskudo ta un símbolo di protekshon. Presisamente p’esei e lema di Dia di Boneiru e aña akí ta ‘Protehando nos isla’.

Pasobra ora bo stima algu, no ta sufisiente pa stim’é so, bo mester kuid’é
tambe. Nos tin ku kuida nos naturalesa, nos idioma papiamentu, nos kultura i
mas importante ainda, nos tin ku kuida otro.

E dia ta kuminsá parti mainta ku e programa ofisial. Pa 8.30 or e reunion solèm di Konseho Insular ta tuma lugá. Despues ta sigui e seremonia protokolar. Entre otro e parada uniformá, hisamentu di Bandera, kanta nos Himno i diferente diskurso. Tambe nos ta honra nos Siudadanonan di Honor.

For di 12.00 or e selebrashon ta sigui riba Plasa Reina Wilhelmina, kaminda pa grandi i chikí tin tur sorto di kos pa hasi. Bishitantenan por gosa di músika, kos di kome, kos di bebe, produkto lokal i diferente presentashon.

Entre otro Moka & Kids, Silver Bullet Steelband, Foyan Boyz, Palu Grandi, Semii Marten, Batanga i Doble R Puru ta subi esenario. Tambe Juliëndra Janga i Raiza Wilsoe, e ganadónan di Ban Kanta Bo Boneiru 2026, ta duna presentashon. Pa 23.45 or nos ta klousurá e selebrashon ku un bunita show di vürwèrk.

Dia di Boneiru ta un dia pa bini huntu, gosa, i duna honor na nos isla. Entidat Públiko Boneiru ta invitá tur hende pa riba 6 di sèptèmber selebrá Dia di Boneiru 2026.

Protehando nos isla.