Diskurso na apertura di aña parlamentario Fergino Brownbill

Diskurso na apertura di aña parlamentario  

2026–2027 

Presidente di Parlamento di Kòrsou 

Fergino Brownbill

Willemstad 

8 di sèptèmber 2026 

Su Ekselensia, Señor Gobernador di Kòrsou, 

Señor Promé Minister, 

miembronan di Parlamento 

miembronan di Konseho di Minister, 

representantenan di organonan di estado, 

distinguído invitadonan, 

dama i kabayero, 

pueblo di Kòrsou stima, 

Felis mainta. 

Ta ku gran honor i un sentido profundo di responsabilidat ku awe mi ta dirigí palabra na boso na  apertura di un aña parlamentario nobo. 

1. E apertura akí no ta solamente un momento protokolario. Ta un momento pa reflehá riba  e kaminda ku nos a kana, pa evaluá e trabou ku a wòrdu hasi i pa determiná e direkshon  ku nos ke sigui komo instituto. 
2. Parlamento ta e órgano representativo di pueblo. Ta den e sala akí e diferente bosnan den  nos komunidat mester haña ekspreshon. Ta aki nos ta debatí, kontrolá gobernashon, traha  lei i tuma desishon ku tin konsekuensia pa bida di kada habitante di Kòrsou. 
3. Na komienso di mi presidensia, mi a presentá tres palabra komo guia pa nos trabou:  Rekonstruí, Rekonektá i Representá. E palabranan akí no ta solamente un lema. Nan ta  un kompromiso ku pueblo i un responsabilidat ku nos mester sigui kumpli kada dia. 

Ora nos wak bèk riba e aña parlamentario 2025–2026, nos por konstatá ku Parlamento no a keda  ketu. 

4. Riba tereno internashonal, Kòrsou tabata instrumental den kreashon di e komishon  spesial di Parlatino ku enfoké direkto riba posishon di karibe den e agènda regional. Nos  delegashonnan a representá Kòrsou na IPKO, Parlamericas, InterExpo, Intertraffic i  Parlatino. Nos kontakto ku e islanan BES tokante WOLBES a redunda den un resolushon huntu ku Aruba i Sint Maarten. Esakinan ta mustra ku Parlamento di Kòrsou ta presente i  ku nos bos ta wòrdu tendé den Reino i den region. 
5. Internamente, nos a pone varios proseso importante den marcha. E Komishon Temporal  di Alohamento a kuminsá guia e trayekto pa un edifisio nobo pa Parlamento. Nos a 

kuminsá ku modernisashon di e manera ku Parlamento ta trata Presupuesto di Pais.  Tambe pruebanan riba frekuensia 102.5 FM a marka e promé paso pa Parlamento tin su  propio medio radial. 

6. Nos a fortalesé nos funshon di kòntròl mediante seshonnan tékniko i reunionnan ku  Ministerio di Finansa, Kontraloria General i Kolegio di Supervishon Finansiero. Alabes,  Parlamento a habri su portanan pa studiante, organisashonnan lokal i institushonnan  haltu. Esaki ta importante, pasobra un Parlamento ku no tin kontakto ku pueblo ta pèrdè  su propósito. 
7. Nos a konmemorá 15 aña di Pais Kòrsou, a honra eks-Presidentenan di Parlamento ku e  “Premio Martin di Oro” i a introdusí “Premio Kokolishi Papiado” pa nos hobennan. Nos  a rekonosé deportistanan i organisashonnan ku nan prestashon a pone nòmber di Kòrsou  haltu. Asina Parlamento a mustra ku representashon no ta solamente trata lei i sifra; ta  trata tambe identidat, kultura, aspirashon i orguyo di nos pueblo. 

Pa tur hende ku a kontribuí na e trabou akí, mi ta ekspresá mi gratitut.  

8. Pero e resultadonan akí no ta un punto final. Nan ta e base riba kua nos mester sigui  konstruí. 
9. Den e aña parlamentario nobo, nos lo sigui fortalesé Parlamento komo instituto. Un  Parlamento fuerte ta dispone di e konosementu, personal, instrumento i proseso nesesario  pa kumpli ku su tarea legislativo i kontroladó. Fortalesé Parlamento ta fortalesé  demokrasia mes. 
10. Nos lo realisá apertura ofisial di e frekuensia di radio di Parlamento. E radio lo bira un  brùg nobo entre e trabou den e sala akí i bida diario di nos pueblo. Informashon parlamentario mester ta aksesibel, kla i serka di siudadano. 
11. Nos lo sigui ku e trayekto pa formalisá e programa edukativo konosí komo “3de kamer”,  inspirá riba e modelo hulandes. Pa medio di e programa akí, muchanan lo siña kon  demokrasia i Parlamento ta funshoná, proseso legislativo i kon nan por forma i defendé 

nan propio opinion den un debate. Asina nos ta invertí den formashon demokrátiko di e  generashon nobo. 

12. Nos lo implementá e struktura nobo di tratamentu di presupuesto. Presupuesto no ta  simplemente un dokumento ku sifra. E ta mustra unda nos prioridatnan ta komo pais.  Pueblo tin derecho di sa kon fondo públiko ta wòrdu gastá, kiko e gastunan mester  produsí i kon Parlamento ta supervisá e resultadonan. 
13. E trayekto pa un alohamentu nobo tambe lo kontinuá. E meta no ta simplemente un  edifisio nobo. Nos mester yega na un kas di pueblo ku ta digno, funshonal, aksesibel i  prepará pa e eksigensianan di un Parlamento modèrno. 

Dama i kabayero, 

14. Ta tempu pa duna Parlamento e lugá ku e mester tin den nos sistema demokrátiko. Pero  esei ta eksigí mas ku proyekto i prosedura. E ta eksigí integridat, transparensia,  responsabilidat i rèspèt. 
15. Mi ta hasi un yamada na tur miembro di Parlamento: laga nos debatí ku firmesa, pero ku  rèspèt. Laga nos diferensianan enrikesé nos demokrasia, sin pèrmití ku nan bira un  opstákulo pa progreso. Tras di kada lei, kada presupuesto i kada desishon tin hende,  famia i komunidat ku ta spera resultado di nos. 
16. Na pueblo di Kòrsou, mi ke bisa: Parlamento ta di boso. Sigui nos trabou. Hasi pregunta.  Duna boso opinion. Tene nos responsabel. E konekshon ku pueblo ku nos ta buska no por  ta un proyekto temporal; e mester bira parti permanente di nos kultura institushonal. 
17. Ku rèspèt pa nos pasado, ku responsabilidat den presente i ku konfiansa den futuro, laga  nos sigui rekonstruí, rekonektá i representá. 
18. Ku fe den Dios i ku amor pa nos pais, mi ta deklará e aña parlamentario 2026–2027  ofisialmente habrí.