Inskripshon pa Kurso Transporte Públiko A i B ta habri 14 di sèptèmber
Tráfiko, Transporte i Planifikashon Urbano
Inskripshon pa Kurso Transporte Públiko A i B ta habri 14 di sèptèmber
Publiká riba 08 Sèptèmber 2026
Willemstad – Servisio pa Tráfiko i Transporte (UOVV) ta anunsiá ku e kursonan pa transporte públiko lo kuminsá pronto.
E kursonan lo duna partisipantenan e konosementu i habilidatnan fundamental nesesario pa un bon start den e mundu di transporte públiko. UOVV ta invitá tur persona interesá pa inskribí pa Kurso di Sertifikado A, ku ta prepará partisipantenan pa traha komo un shòfùr ousiliar.
Además, lo habri tambe e Kurso di Sertifikado B, destiná pa esnan ku ta traha aktualmente den e sektor i ke sigui desaroyá pa bira ‘vergunninghouder’.
UOVV lo publiká e ‘link’ nan pa inskripshon dia 14 di sèptèmber riba www.vvrp.cw, i via medionan sosial. E ‘link’ nan lo keda habrí te dia 21 di sèptèmber.
UOVV ta hasi un yamada na tur esnan ku tin interes den transporte públiko pa tuma e oportunidat aki di formashon. E sektor ta konta ku un futuro prometedó, enfoká riba atenshon, servisio di kalidat, i kontribushon na desaroyo di nos ekonomia lokal.
Pa mas informashon, por app na +59995278244 òf mail na tp.uovv@gobiernu.cw.
