Vetter ta habri kaminda pa mas famia bira doño di nan kas

FKP ta vinkulá e desishon di Korte ku e meta di Mi Kas Awor pa krea mas oportunidat di hasi kas propio alkansabel ku supsidio di kompra

Willemstad, 13 di sèptèmber 2026, Korte Komun di Hustisia a otorgá e propiedat di Plantage Vetter kompletu den man di Fundashon Kas Popular (FKP). E desishon di 8 di sèptèmber último ta habri e posibilidat pa un etapa nobo pa e área di 207.226 m², mas ku 20 hèktar. Pa FKP, e perspektiva ta kla: konektá e reglanan nobo i desaroyo di tereno ku e meta di Mi Kas Awor, pa mas famia por bira doño di nan propio kas.

 

Vetter ta un tereno ku a keda largu tempu sin por a repartí formalmente. Ku e desishon aki, FKP ta haña e base hurídiko pa prepará e desaroyo di e tereno i e entrega di kavelnan. Korte ta señalá spesífikamente e eksperensia di FKP den bibienda públiko, desaroyo di terenonan, inkluso kuido kontra konstrukshon ilegal, i sosten na kumpradónan pa haña finansiamentu. E enkargo ta enserá ku e área ta wòrdu atendé den su totalidat i ku e kavelnan eksistente ta pasa den un proseso igual pa e famianan por bira doño di esakinan.

 

E programa di Mi Kas Awor ta pone kas propio, sentral den bibienda sosial. E modelo di supsidio di kompra, konosí komo “koopsubsidie”, tin komo meta pa yuda famianan superá e diferensia entre loke nan por paga i loke ta nesesario pa kumpra un kas. Segun e kategoria i e kondishonnan aplikabel, e sosten por konsistí di un kontribushon inisial, yudansa ku pagonan mensual òf asistensia pa haña finansiamentu pa un kas na un preis mas aksesibel. Informashon tokante e modelo di Mi Kas Awor.

 

Pa e famia, esaki por nifiká ku e esfuerso di paga kada luna ta yuda krea un patrimonio propio. Ora e famia ta yuda paga su finansiamentu, e ta baha su debe. E meta ta un kas ku e famia por mantené i, ku tempu, laga komo herensia pa e siguiente generashon.

 

Na Vetter, e oportunidat ta sintá den uni e trabou riba derecho di tereno i mehoramentu di e bario ku un ruta finansiero pa kas propio. E desishon di Korte ta permití FKP drecha kasnan eksistente ku no ta den bon estado promé ku entrega i adaptá e plan di distribushon si tin un solushon mihó. Drenahe i demas infrastruktura nesesario pa e área, mester forma parti di e plan.

 

E usuarionan ku Korte Komun di hustisia a menshoná den e desishon di 2020 ta keda, en prinsipio, rekonosé. Korte a stipulá ku FKP por desviá for di e indikashonnan ei solamente pa motibunan di peso den kuadro di e desaroyo. Esaki ta duna un base pa traha ku e famianan i atendé nan situashon a base di kriterionan kla stipulá.

 

E título ku Korte a otorgá ta pa FKP. Pa un famia bira doño, ainda tin un proseso individual pa kompletá. Aplikashon di Mi Kas Awor na Vetter ta rekerí un plan spesífiko, finansiamentu i aprobashon di e kondishonnan. E desishon mes riba su kurpa, no ta otorgá un supsidio na ningun habitante. E sosten mester kuadra ku e entrada i kapasidat di pago di kada famia.

 

E siguiente paso ta elaborá un plan pa Vetter ku ta mustra kua trabounan ta nesesario, kon lo finansiá nan i kua ruta ta posibel pa kada famia. E meta di FKP ku Mi Kas Awor ta ku e famianan por yega serka un notario ku un akuerdo kla i un pago ku nan por karga, pa firma pa nan propio kas.

 

Wak e vonnis akinan

 

Fundashon Kas Popular