Gobièrnu di Kòrsou ta felisitá tur maestro/dosente riba nan dia

“Maestro, e profeshon kreadó di tur otro profeshon”. E profeshon ku ta forma, eduká, stimulá i motivá henter mundu. Kisas no semper mesun apresiá i rekonosé, pero e balor di e profeshon di maestro ta unu fundamental pa edifikashon di un komunidat. Rekonosiendo e maestro komo kreadó di tur otro profeshon, Ministerio di Enseñansa, Siensia, Kultura i Deporte (ESKD) ke honra tur maestro riba e dia internashonal di maestro, esta 5 di òktober 2019.

For di 5 di òktober di aña 1994 mundialmente ta selebrá dia di maestro, konmemorando e aniversario di adopshon di ILO/UNESCO su rekomendashon di 1966 pa loke ta trata e status di e maestro. E tema internashonal pa aña 2019 ta: “Maestro hóben: Futuro di e Profeshon”. Kiko mas energétiko ku un maestro hóben, pashoná i dediká pa invertí den futuro generashonnan. For di un maestro den enseñansa pre-eskolar/skol di fundeshi, te na kolaboradornan sientífiko na universidatnan, tur ta agentenan responsabel pa inyektá konosementu, abilidat i aktitut pa kada prospekto desaroyá optimal i alkansá nan máksimo potenshal.

Direktor – Generaal di UNESCO sra. Audrey Azoulay, a indiká den su mensahe e aña aki: “It is the supreme art of the teacher to awaken the joy in creative expression and knowledge”. Ta ku un arte superior e maestro ta aktivá i lanta e goso pa ekspreshon kreativo i konosementu. Pero riba tur kos e forsa di edukashon i formashon di e maestro ta stimulá henter mundu i asina desaroyá e profeshonalnan di futuro. Pa mas informashon por bishitá e link aki: UNESCO – Dia di Maestro 2019.

Diariamente mundu kompletu ta konfia nan desendientenan na e forsa dinámiko aki, pa asina kultivá e simia pa krese i bira un palu firme, plantá den komunidat. Mundu henter ta dependé di e dedikashon i amor di e maestro pa formashon i edukashon. P’esei ta keda afirmá ku e maestro ta e profeshon di futuro. Den man di e maestro e hende su formashon ta haña bida pa sigui bai dilanti. Pa e motibunan aki durante di Foronan internashonal di UN/UNESCO/ILO/Unicef/UNDP ta pone importansia na e Metanan di Desaroyo Sostenibel 4 (Sustainable Development Goals-4/SDG-4) pa asina por alkansá esakinan konforme e agènda di ‘Global Education 2030’.

Gobièrnu di Kòrsou tambe ta trahando konforme e agènda aki den vários trayekto, kaminda edukashon su enfoke ta keda sigurá den enseñansa di kalidat, inklushon, enseñansa ekitativo pa asina promové enseñansa kontinuo i oportunidat igual pa tur. Ehèmplenan di trayektonan ku ta kuadra ku e SDG-4 ku e ministerio di Enseñansa, Siensia, Kultura & Deporte (ESKD) ta e konferensia ku e tema di Igualdat di género den Skolnan: Inklushon i Unidat i tambe por mustra riba e konferensia ku tema: ‘Quality of education, equity and inclusion, teachers and education workers and life long learning’. Tambe trayektonan manera registrashon di enseñansa pre-eskolar, optimalisashon di enseñansa sekundario i avansá, stimulashon di plataformanan di komunikashon pa tur ‘stakeholders’, maneho pa enseñansa speshal/kultural, programanan di kapasitashon di maestro/dosentenan i fortifikashon di enseñansa obligatorio tur e áreanan ku ta kuadra ku e programa di SDG-4 pa asina nos logra ku e metanan di e ‘Framework for Action – Incheon Declaration for Education 2030′.

Ministerio di ESKD kier stimulá kada hóben pa konsiderá diligentemente e vokashon ku ta kreadó di tur otro profeshon. Ta un tarea digno i atmirabel. Komo gobièrnu di Kòrsou sigur nos lo sigui traha na krea kondishonnan pa e vokashon aki por tin tur loke ta nesesario na su alkanse, pa krea e ambiente adekuá pa kultivá i desaroyá kada simia pa alkansá nan máksimo potenshal.

Maestronan, espesialmente maestronan hóben, Ministerio di ESKD ta honra boso riba boso dia.

Pueblo di Kòrsou ke yama boso danki pa boso aporte ku ta di gran balor pa nos Nashon i alabes nos ta eternamente gradesido na maestronan di edat madurá ku ta e fundeshi i sosten pa kada maestro hóben. Boso tur meresé di keda honrá riba boso dia.

Felis dia di Maestro!