Maidel Yero, John Marvin Kelly y Jandor Lampe, cada uno cu hopi aña di experiencia den e industria turistico, a wordo reconoci pa nan impacto positivo, dedicacion y contribucion na nos industria turistico.

E tres ganadonan di e aña aki ta representa diferente area di e industria:

• Maidel Yero, cu 24 aña di experiencia den turismo, ta traha den Activities & Entertainment na Playa Linda Beach Resort y ta conoci pa e pasion y curason cu e ta dedica na su trabou, creando experiencianan memorabel pa grandi y chikito.
• Jandor Lampe, bartender na La Cabana Beach Resort & Casino, tin 28 aña den e industria turistico y ta conoci pa su energia positivo, entusiasmo contagioso y e manera cordial cu e ta trata su huespednan.
• John Marvin Kelly, miho conoci como “Uncle Johnny”, ta un tourguide na ABC Tours cu mas cu 40 aña di experiencia den e mundo di turismo y ta conoci pa trata cada huesped manera famia, trahando cu dedicacion y compromiso. Tur tres ta comparti un gran amor pa Aruba.

Pa di tres aña consecutivo, e campaña Nominate Your Local Vacation Hero ta duna huespednan e oportunidad pa nomina e localnan cu a haci un diferencia durante nan estadia na Aruba. Den apenas tres siman, a ricibi mas cu 160 nominacion di huespednan cu a comparti historianan tocante acto di bondad, cuido y conexionnan autentico cu Aruba a traves di nos localnan, cu a haci nan estadia special.

Loke ta haci e reconocemento aki mas special y significativo ta cu e nominacionnan no ta bini di A.T.A., sino directamente di e huespednan mes. A traves di nan experiencia personal, nan ta expresa aprecio y reconocemento pa e personanan cu a haci nan estadia mas memorabel y cu a fortalece nan conexion cu Aruba. Mas cu un destinacion, Aruba ta bira un luga cu nan a siña conoce, aprecia y cuida danki na e relacionnan cu nan a forma durante nan estadia.

Durante e tres edicionnan di e campaña, a ricibi mas cu 400 nominacion. Pa selecciona e ganadornan, un comite ta revisa y evalua e nominacionnan basa riba e criterianan estableci. Como e industria turistico ta inclui hopi diferente profesion y departamento, ta scoge tres ganador cada aña pa representa e diferente maneranan cu nos profesionalnan di e industria ta contribui na e experiencia di nos bishitantenan.

“E reconocemento aki ta celebra e personanan cu, dia tras dia, ta brinda e servicio, cuido y hospitalidad cu Aruba ta conoci p’e. Na nomber di A.T.A., nos ta gradici no solamente e ganadornan di e aña aki, sino tambe tur esnan cu ta traha den nos industria turistico y cu ta contribui pa crea e conexionnan autentico cu ta keda den curason di nos bishitantenan,” a expresa Ronella Croes, CEO di A.T.A.

A.T.A. ta felicita nos tres Local Vacation Heroes pa 2026 y ta gradici nan pa nan contribucion valioso na nos industria turistico. Un danki tambe na tur profesional den e sector turistico cu ta traha diariamente cu amor y dedicacion. Nos hendenan ta e forsa tras di nos industria y loke ta haci Aruba un destinacion unico.