KI T’E PLAN TA PREMIER DURANTE NEDERLANDS FILM FESTIVAL
KI T’E PLAN TA PREMIER DURANTE NEDERLANDS FILM FESTIVAL
UTRECHT/WILLEMSTAD – E film kortiku KI T’E PLAN, dirigí pa Rovendley Welvaart, tabata tin su premier na Hulanda djasabra 26 di sèptèmber durante Nederlands Film Festival (NFF) na Utrecht. E screening, parti di e programa Korte Filmblok: Het Grote Ongemak, tabata completamente sold out for di mas o ménos dos siman promé ku e evento, ku alrededor di 450 asiento yená.
Pa e okashon spesial aki, henter cast di KI T’E PLAN tabata presente na Utrecht, entre nan Anton de Bies, Julliard “Hef” Frans, Chanelle de Lau, Gian van Eiker, Steve Martha i Peter Polfriet. Dos miembro di cast a biaha for di Kòrsou pa por ta presente, mientras ku e otro aktornan ta biba na Hulanda.
E anochi tabata tambe e promé biaha ku henter cast por a mira e film huntu riba pantaya grandi, despues di e produkshon na Kòrsou. Nan a mira nan mesun trabou den un sala yená, komo parti di un programa ku diferente korte film Hulandes.
KI T’E PLAN ta usa e figura konosí di Nanzi, profundamente ankrá den kultura i tradishon oral di Kòrsou i Karibe, pa konta un storia kontemporáneo tokante poder, historia, astusia i e konsekuensianan di e desishonnan ku hende ta tuma.
E reakshon di públiko durante e premier tabata positivo, i pa e ekipo e screening tabata un momento importante pa mira un produkshon kompletamente ankrá den kultura Kurasoleño, ku Papiamentu komo idioma sentral, haña su lugá den programa ofisial di Nederlands Film Festival.
“Pa nos, esaki ta mas ku solamente mustra un film na Hulanda. Nos ta trese nos idioma, nos aktornan, nos humor, nos kultura i un figura manera Nanzi den un espasio kaminda cine for di diferente parti di Reino ta topa otro. Mira un sala yená eksperensiá e storia huntu ku nos tabata hopi spesial,” direktor Rovendley Welvaart ta bisa.
Welvaart ta mira e selekshon komo un paso importante pa mas visibilidat di cine Kurasoleño i Papiamentu. E echo ku un produkshon hasi na Kòrsou por forma parti di un festival nashonal grandi na Hulanda ta mustra ku historianan lokal por komuniká ku un públiko hopi mas amplio sin pèrdè nan identidat.
Segundo screening awe na Utrecht
Públiko ku no por a asistí na e premier tin un siguiente oportunidat awe, djamars 29 di sèptèmber, durante Nederlands Film Festival.
KI T’E PLAN lo forma parti di e programa spesial “CURAÇAO en ARUBA presenteren”, ku ta kuminsá 14:15 na Kinepolis Jaarbeurs 9, Utrecht.
Durante e programa aki, seis korte film di Kòrsou i Aruba lo wordu presentá: ALA, E Peso di Mundo, ADRIFT WAK LEU, Pèrdí, Mane Hombu i KI T’E PLAN. Despues di e screening tin un Q&A ku e filmmakernan.
E programa ta duna un plataforma amplio na un generashon di cineasta Karibense i ta pone diferente idioma, perspektiva i historia di nos region dilanti di públiko Hulandes.
