Minister Boekhoudt na Washington pa reunionnan riba sektor di kuido den Karibe
Salubridat Públiko, Medio Ambiente i Naturalesa
Minister Boekhoudt na Washington pa reunionnan riba sektor di kuido den Karibe
Publiká riba 29 Sèptèmber 2026
Washington, 28 di sèptèmber 2026 – Minister di GMN, Tyron Boekhoudt, ta na Washington, D.C. pa un bishita di trabou enfoká riba kolaborashon regional i mehoramentu di nos sektor di kuido.
Durante e siman aki, minister Boekhoudt lo partisipá na e di 53 di reunion di salubridat di Council for Human and Social Development (COHSOD) di CARICOM. Den e reunion, representantenan di paisnan Karibense a trata temanan ku tambe ta importante pa Kòrsou, entre otro prevenshon, malesanan króniko, disponibilidat di personal di kuido i preparashon pa emergensianan di salú.
For di ayera, minister Boekhoudt ta sigui e reunionnan di Directing Council di Organisashon Panamerikano di Salú (PAHO). Tambe tin kombersashonnan planifiká ku PAHO tokante kon pa fortalesé kuido primario, sistema di informashon di salú i aksesibilidat di remedi.
Un punto importante di e bishita ta e Country Cooperation Strategy 2026–2031, e dokumento ku ta duna direkshon na kolaborashon entre Kòrsou i PAHO pa e añanan benidero. E prioridatnan ta inkluí kuido primario i prevenshon, kombatimentu di malesa, i un sistema di kuido di salú mas fuerte i efisiente.
“Nos ke usa e kolaborashon regional pa logra pasonan konkreto pa Kòrsou. Prevenshon, kuido di nivel haltu i aksesibilidat di kuido ta sentral den e trabou aki,” minister Boekhoudt a bisa.