Minister Boekhoudt ta firma ‘Country Cooperation Strategy’ entre Kòrsou i PAHO
Salubridat Públiko, Medio Ambiente i Naturalesa
Minister Boekhoudt ta firma ‘Country Cooperation Strategy’ entre Kòrsou i PAHO
Publiká riba 02 Òktober 2026
Washington, D.C. – Minister di GMN, Tyron Boekhoudt, huntu ku Direktor di Pan American Health Organization (PAHO), Dr. Jarbas Barbosa, a firma e Country Cooperation Strategy (CCS) 2026–2031 entre Kòrsou i PAHO.
E strategia aki ta marka un paso importante den e kooperashon entre Kòrsou i PAHO i ta pone un kuadro kla pa e prioridatnan di salubridat públiko pa e próksimo añanan.
Bou di e ambishon “Un Kòrsou Salú, A Healthy Curaçao”, e strategia ta enfoká, entre otro, riba fortalesementu di kuido primario, prevenshon i maneho di malesanan transmisibel i no transmisibel, salú mental, i desaroyo di un sistema di kuido ku ta resiliente, sostenibel i ku por sigui atendé e nesesidatnan di pueblo di Kòrsou
Minister Boekhoudt a indiká ku e dokumento aki ta importante, pero ku e siguiente fase ta mas importante: implementashon.
“Awor nos mester tradusí e prioridatnan aki den akshon konkreto. Nos meta ta pa e kooperashon aki resultá den mehorashonnan real i duradero den salú di nos pueblo,” Minister Boekhoudt a deklará.
Minister Boekhoudt a ekspresá su rekonosementu tambe na Dr. Gabriel Vivas Francesconi, representante di PAHO/WHO pa Kòrsou, i su tim na ofisina di Trinidad & Tobago, i tambe na e koleganan di GMN na Kòrsou ku a kontribuí na realisashon di e strategia.
Ku e firmanentu di e Country Cooperation Strategy 2026–2031, Kòrsou i PAHO ta reafirmá nan kompromiso pa sigui traha huntu pa fortalesé salubridat públiko i kuido na Kòrsou, ku un meta kla: Un Kòrsou Salú.
