Preguntanan segun artíkulo 96 di Reglamentu di Òrdu tokante  seguridat na playanan di Kòrsou i protekshon di turista i komunidat

Minister di Desaroyo Ekonómiko

Sr. Roderick Middelhof 

Fort Amsterdam 17

Kòrsou 

 

7 di òktober 2026

 

Tópiko: Preguntanan segun artíkulo 96 di Reglamentu di Òrdu tokante  seguridat na playanan di Kòrsou i protekshon di turista i komunidat

 

Apresiabel señor Middelhof,    

 

Suskrito, miembro di frakshon di Movementu Futuro Kòrsou den Parlamento di Kòrsou, David Seferina, ta pidi bo atenshon pa lo siguiente.

 

Playanan di Kòrsou ta hunga un papel importante den nos turismo i den e imágen di Kòrsou komo destinashon turístiko. Sin embargo, den último tempu nos ta risibí diferente notisia di turista ku lamentablemente ta pèrdè nan bida den laman na nos playanan. 

 

Situashonnan asina ta hopi trágiko i doloroso pa e famianan envolví. Pero na mes momento, nan por tin un efekto negativo riba e imágen di Kòrsou komo destinashon turístiko, si nos no tuma medida pa prevení aksidente i hasi nos playanan mas sigur. 

 

Den e kuadro aki, a bini dilanti ku Curaçao Tourist Board a yega na un akuerdo di koperashon ku Blauwe Kruis pa mehorá e manera ku ta duna yudansa médiko ora tin un emergensia na nos playanan. 

 

Sin embargo, ainda tin algun punto ku mester di mas klaridat, spesialmente ora nos ta papia di un maneho integral pa garantisá seguridat na nos playanan, tantu pa e turista komo pa abitantenan di Kòrsou. 

 

Konsiderando e importansia di turismo pa Kòrsou pero tambe seguridat na nos playanan, suskrito, hasiendo uso di artíkulo 96 di Reglamentu di Òrdu, ta hasi e siguiente preguntanan

 

1. Minister por splika kiko e akuerdo di koperashon entre Curaçao Tourist Board i Blauwe Kruis ta kontené konkretamente, i ki tarea i responsabilidat kada partido tin bou di e akuerdo aki?

 

1. Kiko konkretamente e akuerdo aki ta garantisá na momento ku un persona tin mester di yudansa médiko urgente na un di nos playanan? 

 

1. Tin sufisiente bòrchi na nos playanan ku informashon manera atvertensia tokante koriente i kondishon di laman, kon aktua si un persona haña problema den laman, kon i unda pidi yudansa den kaso di emergensia, i numbernan di emergensia kla i visibel pa turista i abitantenan sa ken nan mester yama ora tin un aksidente òf otro emergensia? Si esaki no ta e kaso, Gobièrnu tin un plan pa instalá bòrchinan ku informashon i numbernan di emergensia na nos playanan pa turista i abitantenan por sa unda i na ken nan mester akudí ora tin un emergensia? 

 

1. Gobièrnu ta konsiderá pa introdusí lifeguards profeshonal na e playanan mas frekuentá di Kòrsou, manera ta sosodé na hopi otro destinashon turístiko, pa asina oumentá seguridat di turista i abitantenan ku ta hasi uso di e playanan? 

 

1. Tin salbabida (lifebuoy) òf otro ekipamentu di reskate disponibel na nos playanan pa hende ku ta den serkania por yuda un persona ku ta den problema den laman? Si esaki no ta e kaso, Gobièrnu ta dispuesto pa evaluá posibilidat pa instalá e tipo di ekipamentunan aki na nos playanan?

 

1. Gobièrnu tin un plan integral di ‘beach safety’ pa hasi nos playanan mas sigur, tantu pa turista komo pa nos propio abitantenan? Si ta asina, por splika e medidanan ku ta inkluí den e plan aki? 

 

Ku e preguntanan aki suskrito no ke krea preokupashon, sino hustamente pone énfasis riba prevenshon i riba e importansia pa tuma medida na tempu. Seguridat na nos playanan no ta solamente importante pa turismo, sino tambe pa protehá bida di hende i pa mantené konfiansa den Kòrsou komo destinashon. P’esei ta importante pa Gobièrnu tin un maneho kla i bon organisá, ku medidanan konkreto pa hasi nos playanan mas sigur, tantu pa e turista komo pa nos propio abitantenan ku ta hasi uso di nan. 

 

Suskrito ta apresiá si minister por duna kontesta riba e preguntanan hasi por eskrito. 

 

Atentamente, 

 

David Seferina, 

Parlamentario pa

frakshon di MFK