Un dia na laman no mester terminá den tragedia Seferina ta pidi Gobièrnu pa prevení aksidente i hasi playanan di Kòrsou mas sigur. 

Un dia na laman no mester terminá den tragedia

Seferina ta pidi Gobièrnu pa prevení aksidente i hasi playanan di Kòrsou mas sigur. 

 

Parlamentario David Seferina di frakshon MFK a dirigí preguntanan na Minister di Desaroyo Ekonómiko tokante seguridat na playanan di Kòrsou. E preguntanan ta bini despues di diferente notisia den último tempu di turista ku lamentablemente a pèrdè nan bida den laman na nos playanan. 

Segun sr. Seferina, kada un di e situashonnan aki ta un tragedia pa e famianan envolví. Na mes momento, nan ta mustra e importansia pa sigui wak kon Kòrsou por hasi su playanan mas sigur, tantu pa turista komo pa nos propio abitantenan.

“Nos playanan ta hopi importante pa nos turismo, pero promé ku tur kos, nos ta papia di seguridat i bida di hende. P’esei nos mester wak kiko mas nos por hasi pa prevení aksidente i pa yudansa por ta disponibel mas lihé ora algu pasa,” sr. Seferina ta indiká.

Den e kuadro aki, sr. Seferina ta referí na un akuerdo di koperashon entre Curaçao Tourist Board i Blauwe Kruis pa mehorá yudansa médiko den kaso di emergensia na playanan. E parlamentario ta pidi mas klaridat tokante kiko e akuerdo aki ta kontené, kua responsabilidat kada partido tin i kiko un persona por spera konkretamente ora tin un emergensia na playa. 

Un otro punto ku sr. Seferina ta pone dilanti ta informashon na playanan. Segun e parlamentario, mester wak si tin sufisiente bòrchi kla i visibel ku atvertensia tokante koriente i kondishon di laman, instrukshon tokante kiko hasi ora un persona ta den problema, i numbernan ku turista i abitantenan por yama den kaso di emergensia.

Sr. Seferina ta pidi Gobièrnu tambe pa evaluá e posibilidat di tin lifeguards profeshonal na e playanan ku ta risibí mas bishitante. Ademas, e ke sa si na nos playanan tin salbabida òf otro ekipamentu di reskate disponibel ku por wòrdu usá rápidamente ora un persona ta den problema den laman. Si esaki no ta e kaso, e ta pidi Gobièrnu pa evaluá kon e tipo di ekipamentunan aki por wòrdu instalá. 

Finalmente, sr. Seferina ke sa si Gobièrnu tin un plan integral di beach safety pa Kòrsou. Segun e parlamentario, seguridat na playa no mester dependé solamente di e manera ku ta reakshoná despues ku un aksidente a sosodé. Prevenshon mester forma un parti importante di e maneho tambe.

“Ku e preguntanan aki nos no ke krea preokupashon. E intenshon ta hustamente pa pone énfasis riba prevenshon i pa wak kon nos por tuma medida na tempu. Ora un emergensia sosodé, mester ta kla ken ta aktua, kon yudansa ta yega i kua ekipamentu tin disponibel. Pero na mes momento nos mester hasi tur loke ta rasonablemente posibel pa prevení ku un situashon grave sosodé, asina sr. Seferina ta indika.”

Seferina ta enfatisá ku seguridat na playa no ta solamente un asuntu di turismo. E ta trata tambe di protehá bida humano i di mantené konfiansa den Kòrsou komo un destinashon kaminda tantu bishitante komo abitante por hasi uso di nos playanan ku mas seguridat.

 

David Seferina,

parlamentario pa 

Frakshon di MFK