QMQ Organization ta presentá 5 partisipante pa e di 5 edishon di Miss Teenage Curaçao 2026

QMQ Organization ta presentá 5 partisipante pa e di 5 edishon di Miss Teenage Curaçao 2026

Willemstad- QMQ Organization ta den selebrashon total pa e di 5 edishon di Miss Teenage Curaçao den e era nobo. Despues ku CYBECO a selebrá 35 aña largu e sertámen di Miss Teenage Curaçao, e aña aki QMQ Organization ta selebrá e di 5 edishon di e sertámen. Na 2021 Ayanette Haard Statia huntu ku su ruman Edmee Haard Statia, a kuminsa organisá formalemente e sertámen aki bèk kual sigur a wòrdú rekonosé komo e sertámen di hubentut di momento. Loke sigur a hala atenshon ta ku tur aña di nobo, ganadornan ta haña e oportunidat pa biaha i representá Kòrsou na sertámen nan internashonal grandi i di nivel haltu.

Pa hasi e aña aki mas spesial, QMQ Organization ta selebrá engrande. Miss Teenage Curaçao 2026 ta e di 5 edishon bou di organisashon nobo. A skohe 5 partisipante fuerte den e kompetensia i komo chèri riba e bolo, tur 5 partisipante ta haña e oportunidat pa representá Kòrsou internashonal otro aña ku Dios ke na 5 sertámen internashonal grandi ku QMQ Organization ta traha kune. Pronto lo publiká ofisial e 5 sertámen nan aki. 

Un biaha mas QMQ Organization ta demostrá ku e ta traha ku kurason pa hóben damanan di Kòrsou i ta duna un eksperensia úniko i di nivel haltu na e partisipantenan i esnan ku ta representá Kòrsou i QMQ Organization internashonal.

E 5 partisipantenan pa Miss Teenage Curaçao 2026, den órden alfabétiko ta; Breanna Martines, Francindy Sebelon, Kymberly Jimenez, Marianchely Arrindel i Royjenica Martha. 

E partisipantenan ya ta den preparashon ku nan lèsnan di pasarela, seshonnan di fotografiá i papia den públiko pa asina nan ta kla prepará pa e gran final di e sertámen ku lo ta djabièrnè 30 óktober 2026 den auditorio di WTC.  Sigui tur página sosial di QMQ Organization pa por disfrutá di kada momentu di e partisipantenan i nan eksperensia, rumbo pa e gran final di Miss Teenage Curaçao 2026.