KÒRSOU SU SELEKSHON DI U-15 TA KLA PA REPRESENTÁ NOS NA E PROMÉ FESTIVAL DI FIFA! ESAKI LO TUMA LUGÁ DI 22 PA 30 DI ÒKTOBER 2026 NA BAKU, E KAPITAL DI AZERBAIJAN!
KÒRSOU SU SELEKSHON DI U-15 TA KLA PA REPRESENTÁ NOS NA E PROMÉ FESTIVAL DI FIFA! ESAKI LO TUMA LUGÁ DI 22 PA 30 DI ÒKTOBER 2026 NA BAKU, E KAPITAL DI AZERBAIJAN!
E idea pa organisá un festival di futbòl pa hungadó di U-15 a surgi na desèmber 2025, durante un konferensia den kuadro di preparashon pa e Mundial 2026. Riba konseho di tur presente FIFA a konfirmá e introdukshon di e torneo, ku ta habri su porta pa tur 211 Asosiashon Miembro di FIFA, sin importá nan tamaño òf tradishon futbolístiko.
Komo miembro di FIFA, Federashon di Futbòl Kòrsou tambe a risibí e invitashon pa partisipá den e festival i a aseptá e oportunidat aki ku man habrí.
E enfoke prinsipal di e festival ta pa duna hungadó hóbennan di tur pais miembro, e oportunidat pa sigui desaroyá nan talento den un ambiente internashonal, miéntras ku nan ta prepará e grupo pa e próksimo torneonan den nan trayekto futbolístiko.
Pa tene kuenta ku e nesesidatnan di desaroyo di hungadónan di U-15, e partidonan lo tin un formato adaptá. Kada partido lo dura 20 minüt pa banda, ku 5 minüt di deskanso. Ademas, e partidonan lo hunga riba tereno mas chikí, den un formato di 8 kontra 8.
Durante e festival, kada pais lo hunga por lo menos 10 partido, ku ta duna e hungadónan mas oportunidat pa gana eksperensia i sigui mehorá nan nivel di wega. Segun e skema, e timnan lo por hunga un òf dos partido pa dia.
Despues di simannan di preparashon, e staf tékniko a yega na un selekshon di 14 hungadó, inkluyendo 2 kiper, ku lo biaha pa Baku pa representá Kòrsou durante e evento internashonal aki. E selekshon ta kla pa demostrá nan talento, sigui desaroyá nan abilidatnan futbolístiko i atkirí un eksperensia úniko den un festival ku ta reuní talentonan hóben di tur parti di mundu.
E fase di grupo lo determiná e posishonnan pa e siguiente etapa di e torneo. Durante e etapa di kualifikashon, e timnan lo hunga 4 te ku 5 partido den un formato di round-robin. Despues, segun e resultadonan i e posishonnan ku kada ekipo terminá, kada tim lo hunga 4 te ku 5 partido adishonal den e siguiente fase di e torneo.
Un total remarkabel di 198 Asosiashon Miembro di FIFA lo ta representá na e Festival di FIFA U-15 2026. Kòrsou su promé 5 weganan ta den grupo F huntu ku Belize, Costa Rica, Liberia, Maroko i Filipinas.
Tur delegashon mester konsistí di 14 hungadó (inkluyendo 2 kiper) i 6 miembro di staf pa e tim. E torneo aki tabata solamente pa hungadónan ku nasé na aña 2011 òf 2012.
Tur e partidonan di e festival lo tuma lugá na e kompleho di Hovsan na Baku, Azerbaijan.
Pa e hóbennan di Kòrsou, e partisipashon aki ta mas ku solamente un torneo; ta un oportunidat pa midi nan abilidat kontra otro talento internashonal, siña di diferente kultura futbolístiko i sigui traha riba nan desaroyo pèrsonal i komo deportista.
Nos selekshon ta den preparashon pa duna un bon presentashon aya na Baku.
Keda pendiente pa mas informashon…
16 òktober 2026
