Kòrsou lo ta pais anfitrion di Caribbean Games na 2029

Willemstad – Kòrsou a keda elegí awe, djadumingu 18 di òktober 2026, komo pais anfitrion pa organisá Caribbean Games (Weganan Karibense) na 2029. Asamblea General di Caribbean Association of National Olympic Committees (CANOC) a tuma e desishon aki awe durante su di 24 Asamblea General, ku e aña aki a tuma lugá na Kòrsou. CANOC ta e organisashon prinsipal ku ta agrupá e komiténan olímpiko nashonal den Karibe. Meta di CANOC ta pa stimulá deporte i desaroyo deportivo den region, organisá programa pa atletanan i federashonnan, i representá e komiténan olímpiko di region. E miembronan ta reuní den Asamblea General; e aña aki Kòrsou tabata anfitrion di e reunion ei.

Kandidatura di Kòrsou a keda presentá dor di e komité olímpiko nashonal di Kòrsou, Federashon Deporte i Olímpiko Kòrsou (FDOK), ku sosten di Gobièrnu di Kòrsou. Esaki ta nifiká ku na 2029 Kòrsou ta risibí hopi atleta, komo tambe hopi entrenadó, ofisialnan deportivo i bishitante for di henter Karibe.

Caribbean Games ta un evento regional di diferente deporte ku ta keda organisá bou di maneho di CANOC. Kada biaha e weganan ta tuma lugá den un di e paisnan ku ta miembro, ku por presentá nan kandidatura pa organisá nan. E promé edishon a tuma lugá na Guadeloupe na 2022, ku mas ku 800 atleta for di 29 pais i teritorio. E weganan ta duna e mihó deportistanan di region e oportunidat pa kompetí na nivel internashonal den nan mes region. Na Kòrsou, lo trata di un evento di mas o ménos dies dia ku dies disiplina deportivo, kaminda e kompetensia nan lo tuma lugá na diferente fasilidatnan partí rònt di e isla. FDOK ta responsabel pa e organisashon i ta traha huntu ku CANOC, e federashonnan deportivo, sektor privá i Gobièrnu. Un grupo di trabou inter-gubernamental lo ta e punto di kontakto fiho di Gobièrnu pa FDOK. Huntu nan lo hasi un inventario di e fasilidatnan deportivo, kapasidat di akomodashon hotelero, transporte i seguridat.

Promé Minister Gilmar Pisas: “Esaki ta atrobe un dia di orguyo pa henter Kòrsou. Despues di e partisipashon histó­riko di nos pais na Kampeonato Mundial di Futbòl, Kòrsou ta demostrando atrobe ku e ta meresé un lugá den mundu deportivo internashonal. Kòrsou ta e pais di Blue Wave, di Andruw Jones i di e kampionnan di Little League. P’esei Gobièrnu ta para firmemente tras di FDOK i lo traha huntu ku nan pa organisá un evento deportivo ku henter region lo kòrda ku orguyo. Nos ta gradisí CANOC pa e konfiansa i ala bes den 2029 nos ta yama e deportistanan di henter Karibe bon biní kaluroso na nos isla.”