Eskurshon pa konosé Kòrsou pa partisipantenan di ‘Rijdend met Kompas’

Willemstad – Riba djasabra, 7 di novèmber 2026, Nostra Growth a organisá un ekskurshon den e área di Otrobanda i Banda Bou, komo parti di e kurso ‘Rijdend met Kompas’. E kurso aki ta duná formashon na e sektor di transporte, spesialmente taksi i bùs.

E ekskurshon tabatin komo propósito pa amplia e konosementu di e partisipantenan tokante historia, kultura, tradishonnan i lugánan di interes na Kòrsou.

Un guia turístiko profeshonal sertifiká a kompañá e grupo for di WTC, i a kompartí informashon tokante e orígen di Kòrsou, su promé abitantenan, ken a deskubrí e isla, e lugánan históriko i kultural entre Zakitó i Otrobanda, i diferente brùg ku nan importansia.

Paradanan

• Brionplein: Informashon tokante Otrobanda, Punda, Scharloo i Pietermaai, ku atenshon pa nan historia i desaroyo.

• Plataforma na Tera Kòrá: Splikashon tokante e mulinanan di bientu riba e ‘vlakte’ di Noordkant, desaroyo di e área i kambio den tipo di bibienda.

• Rekorido pa Banda Bou (Barber, Hòfi Pastor, Wakawa): Konosementu tokante e áreanan, nan karakterístikanan i balor históriko, kultural i natural.

• Westpunt: Rekomendashonnan pa kompartí ku bishitantenan, spesialmente tokante e turtuganan den laman, nan habitat i e peliger ku nan ta konfrontá si hende mishi ku nan.

• Kenepa Grandi: Un di e lugánan natural mas konosí di nos isla pa landa.

Konklushon

E ekskurshon tabata un eksperensia interesante i edukativo pa tur partisipante. E tipo di formashon aki ta importante, pasobra shofùrnan di transporte públiko tin responsabilidat grandi: nan no solamente ta transportá pasaheronan, sino tambe ta representá nos isla i transmití informashon korekto.

Un bon konosementu di Kòrsou, huntu ku servisio di kalidat, ta kontribuí na un mihó eksperensia pa tur usuario. Konosé nos isla ta e promé paso pa por represent’é ku orguyo.

E kurso ‘Rijdend met Kompas’ ta un kolaborashon entre Servisio pa Tráfiko i Transporte(UOVV), Curaçao Tourist Board (CTB), i Nostra Growth.