WILD CATS KAMPEON DI BASEBALL AA 2016 I GANADÓ KOPA JOHNY ALBERTO
Wild Cats kampeon di baseball AA 2016 i ganadó Kopa Johny Alberto
Direktiva di BBC Wild Cats KJ 74 Guardian Group ku hopi orguyo ta anunsiá, ku despues di un kampeonato 2016 hopi eksitoso, e tim despues di 15 aña a logra rekonkistá e titulo komo kampeon di baseball AA 2016 na Kòrsou.
E logro grandi aki a bira posibel, danki na un esfuersonan konhunto di e kuerpo tékniko, hungadónan, miembronan di direktiva i patrosinadònan.
Den kuadro di selebrashon di 50 aña di e ekipo, e logro aki tambe ta un forma pa gradisí fundadó di e ekipo, ku ta sr, Hubert Swini Gomes, i esun ku despues a djòin desplegando un gran trabou, pa kontribuí na e desaroyo eksitoso di último 50 añanan.
Wild Cats ta e ekipo di baseball, ku a establesé rekòrtnan grandi, manera e.o.
8 aña konsekutivo, komo kampeon di Kòrsou.
E aña aki, esfuerso èkstra ku e klup a hasi, a duna fruta i ta impreshonante, si tuma na kuenta, ku durante kampeonato regular, e ekipo a terminá sólido na promé lugá, ku un rekòrt di 21 wega gana i 3 pèrdí, den play off semifinal. a eliminá Sta Rosa, ganando e seri 3-2, i pa terminá e temporada di un forma eksitoso, ganando e seri kontra Sta Maria Pirates 4-0, ku skornan grandi resp.
14-9, 17-3, 2-0 i 11-2.
Durante seri final e picheo di Wild Cats a sobresalí, dominando e bateria fuerte di Sta. Maria, e defensa a funshoná na nivel, miéntras Wild Cats a demostrá un bateo bárbaro.
Resultadonan di e sifranan kumultativo di e 4 weganan ta lo siguiente:
45 kareda, 53 hit i 7 eror pa Wild Cats i 14 kareda, 20 hit i 4 eror pa Sta Maria.
E sifranan ta papia palabra kla.
Finalmente un otro punto positivo di Wild Cats e aña aki ta e hecho, ku ningun pelotero a risibí kastigu durante e temporada aki, i e ekipo, a konsentrá riba hunga bon beisbòl.
Finalmente un danki masha spesial, na Kenley Jansen, i Guardian group , pa nan aporte finansiero,i danki na tur fanátiko, i un danki spesial na tur medio di publisidat.
Na nòmber di direktiva di BBC Wild Cats