ANVR ‘Travel4School’ ta koperá ku Tanchi Emma i su 120 muchanan

ANVR ‘Travel4School’ ta koperá ku Tanchi Emma i su 120 muchanan
Despues di ANVR su kongreso ku a tuma lugá di 16 te ku 20 di novèmber aki na Kòrsou, e organisashon di biahe Ulandes, ANVR, no kier a bandoná nos isla sin laga un bunita marka atras. E kongreso aki a konta ku mas di 230 partisipante di organisashonnan di biahe. 
ANVR ta uni ku ‘Travel4School’, ku a keda fundá spesialmente pa e okashon aki, pa un bon kousa na e kongreso aki i futuro kongresonan kaminda e enfoke ta poné prinsipalmente riba muchanan.
‘Travel4School’ gustosamente a entregá €5.000,= na Tanchi Emma djabièrnè 18 di novèmber durante e kongreso di ANVR, ya asina e por kontinuá ku plaser i sin interes di ganashi ku su “naschoolse opvang” pa mas di 120 muchanan den e area di Fuik.
 
Tanchi Emma ta sòru pa e muchanan traha “huiswerk”, ta duna nan kuminda mèrdia i ta guia nan ku kariño, amor i atenshon, ya nan no ta fèrfelá nan mes riba kaya. Mayoria di e muchanan aki tin solamente un figura maternal, ku mayoria bia tin diferente trabou pa por gana plaka. 
Ta trata aki di un meta konkreto: e bùs di Tanchi Emma a daña i ta hopi importante pa drecha esaki. Ta ku esaki e ta transportá e muchanan ku mester di un kabe’i boto. 
 
Huntu ku un otro instansha importante aki na Kòrsou, e fundashon ‘Run in th Sun’, kual ta organisadó di e KLM Curaçao Marathon, ANVR kier hasi un kontribushon balioso na e bon trabounan ku Tanchi Emma ta realisando. 
 
Frank Oostdam, direktor i presidente di ANVR: “Asina ’ki nos di industria di biahe tambe por laga algu realmente palpabel atras despues di un kongreso asina. ANVR i tur agensia di biahe afiliá na nos ta tuma diferente medida ora ta trata di “Better Holidays” i redukshon di e marka CO2 di biahe. Pero asina ’ki nos ke laga hustamente un marka positivo atras. Na Kòrsou awor nos ta kuminsá kuné, pero ‘Travel4School’ ta sigui na e futuro destinashonnan di e kongreso.”