PNP NO TA SOSTENE MOSHON, MOSHON ASEPTA DEN PARLAMENTO TA KONTRA DI KONSTITUSHON DI KÒRSOU

PNP NO TA SOSTENE MOSHON, MOSHON ASEPTA DEN PARLAMENTO TA KONTRA DI KONSTITUSHON DI KÒRSOU

Willemstad – Durante e reunion públiko di Parlamento di Kòrsou di dia 25 novèmber 2016, un mayoria den Parlamento a aseptá un moshon den kua ta ‘instruí’ Gobièrnu, lesa Minister di Tráfiko, Transporte i Planifikashon Urbano (mihó konosí komo VVRP), pa den un término di 15 dia tene un reunion ku “stakeholders” envolví den e área di urbanisashon. Meta di e reunion ta pa dikta kiko ta e regla i palabrashonnan nobo riba tereno di urbanisashon, komo parti di e resolushonnan di Nashonnan Uni (UN) ku a keda aseptá durante Habitat III. E moshon no ta tene kuenta ku nos konstitushon i e lei di kontabilidat, i tampoko e adaptashon di e resolushonnan di Habitat III na realidat di nos pais.

E ‘Agènda Urbano Nobo’ ku a keda aseptá na Quito, ta un guia pa pais, siudat i regionnan. Den e dokumentu aki tin liñanan dirigí riba desaroyo urbano i kon pa anda ku esaki. E ‘Agènda Urbano Nobo’ ta un palabrashon i e no un obligashon. Habitat III ta simplemente un teoria ku ainda tin ku haña su forma i krea mas definishon riba esaki. Ademas no tin nada práktiko ku a hasi riba esaki. Kada ken por usa e rekomendashonnan i duna kontenido na nan, a base di nan propio situashon.

Partido Nashonal di Pueblo (PNP) ta sostené e resolushonnan di Habitat III i den su Programa di Akshon 2016-2020 pa elekshon 2016, a proponé pa duna doñonan di tereno na Kòrsou, e posibilidat di desaroyá por lo ménos 25 porshento di nan tereno. Ademas, a proponé tambe pa desaroyá i konstruí edifisionan di mas ku 3 piso. PNP ta sostené tambe pa traha urbanisashon mas konsentrá riba un área, i segun prinsipionan di urbanisashon moderno i duradero. E promé paso ta e proposishon di lei pa desaroyá Oostpunt ku a entregá na Parlamento.

E Minister di VVRP ku ta forma parti di PNP, ya a start e proseso pa revisá e plan di zonifikashon konosí komo ‘EOP’ (Eilandelijke Ontwikkelingsplan). E Minister a firma un kolaborashon na sèptèmber último ku United Nations Office for Project Services (UNOPS) ku ta duna e Minister i su Ministerio akseso na tur organisashon di UN i partnernan stratégiko. Organisashonnan manera UN Habitat, Earth Institute, University of Oxford, United Nations Environmental Program i hopi mas ta na nos alkanse i nos por konta ku nan ekspertisio i sosten. Tambe nos por hasi uso di ekspertisio di Hulanda a base di algun Memorandum òf Understanding (MOU) ku tin firmá ku Ministerio di Infrastruktura i Medio Ambiente di Hulanda i Gemeente Rotterdam. Ta huntu ku nos ekspertonan lokal, den kombinashon ku e ekspertonan internashonal, nos ta revisá e lei di zonifikashon i urbanisashon di Kòrsou. Ta den e kuadro aki e Minister di PNP a enkargá 10 persona di su servisionan di infrastruktura pa e reunion di Habitat III, komo parti di e preparashon pa yega nan un lei nobo di urbanisashon. A base di esaki Minister di VVRP lo proponé un lei nobo basá riba prinsipionan moderno pa remplasá e leinan na base di EOP i e EOP mes. E trayekto pa yega na un lei nobo di Urbanisashon lo ta inklusivo, inovativo i integral.

Mester ta kla ku e moshon presentá den parlamento awe, ta kontra di nos konstitushon kaminda Parlamento ke subi stul di e mandatario i ke ‘instruí ‘un Minister. Esaki no por simplemente a base di e responsabilidat di parlamento komo ‘trahadó di lei i kontroladó di Gobièrnu’ versus di responsabilidat di e Minister komo ehekutivo. E moshon konsekuentemente ta kontra di Trias Polítika. PNP a buska un solushon i a sugerí un amienda riba e moshon pa formulá en bes di ‘instruí’ ku ta ‘urgi’ Gobièrnu pa den un término di 2 luna en bes di 15 dia ku ta irealístiko, organisá un “stakholdersmeeting” manera proponé.

PNP no ta sostené e moshon i e mandatario di PNP lo no ehekutá e moshon, pero e lo sigui riba e trayekto pa bin ku un lei moderno di urbanisashon.

partido-nashonal-di-pueblo-pnp

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: