MFK: EOP = Eindelijk Ontwikkelings Plan, Un Pais ku un poblashon demasiado chikí pa karga su gastunan mester krese i esaki mester sosodé di forma sostenibel

EOP = Eindelijk Ontwikkelings Plan

Un Pais ku un poblashon demasiado chikí pa karga su gastunan mester krese i esaki mester sosodé di forma sostenibel

Un moshon históriko a tuma lugá djabièrnè siman pasa ora nos a adoptá resolushon di Nashonnan Uní pa garantisá ku nos ta sigui tendensia di mundu despues ku ekspertonan a analisá pa e último 20 añanan kon e desaroyo sostenibel urbano i di konstrukshon di kasnan tin ku tuma luga.

“Nos bida lo ta poko pa duna nos pais” palabranan ku djabièrnè último ta aplikabel na e akshon ku ta garantisá ku futuro generashonnan por haña un Kòrsou mihó organisá i desaroyá sostenibelmente.

Nos ta spera ku otro organisashonnan polítiko lo uní na final pa e kousa ku ta mas importante ku nos mes. Si desaroyo sostenibel no haña prioridat aworakí nos fondonan sosial lo no sali for di e situashon di preshon di insolvabilidat ku nan ta den dje pa mas di 20 aña. Nos mester di un base mas amplio di poblashon pa asina por karga e gastunan i asina stòp di pasa e faktura na e poblashon aktual.

Desaroyo sostenibel no por tuma lugá ku e leinan aktual di desaroyo antikuá ku tin riba mesa, p’esei ta imperativo ku Staten ta akshoná su mes ku e úniko tarea di trese un legislashon nobo riba mesa aktualisá i garantisando e desaroyo sostenibel pa nos pais manera a akordá na Quito, Ecuador – Habitat III huntu ku ekspertonan internashonal den e materia aki.

Gerrit F. Schotte
Kòrsou, 27 novèmber 2016