E biahe ku a kambia bida…
E biahe ku a kambia bida…
Willemstad- Resientemente un i tur presente por a gosa di un biahe fasinante na iglesia House of Worship. Esaki no tabata kualke biahe, sino é biahe ku lo kambia bida.
Pueblo di Kòrsou a yega masalmente pa eksperensiá e musical entitulá Pasobra Dios a stima mundu. Tabata un musical bendishoná pa grandi i chikí ku un mensahe poderoso. E mensahe di salbashon den Kristu Hesus, ku ta Esun ku Dios a manda pa nos, pasobra El a stima mundu asina tantu. E mensahe ku nos ta un den Señor, sin importá rasa, aspekto físiko ni origen tambe a reflehá durante henter e musical.
Tabata un musical kaminda diferente aspekto di arte a keda ekpresá, glorifikando Dios Su nòmber. Den e musical por a skucha kantikanan grabá na papiamentu riba ritmonan di mas ku 10 parti di mundu, entre nan nos propio tumba i seú. E biahe a kuminsá ku un bunita baile na aeropuerto, siguí pa Brazil, pasa Kenya i asina pasa rònt mundu den klimanan kalor i friu bishitando entre otro Groenland, India, Hulanda i Israel. Tur e kansionnan akí ta dokumentá riba e CD di Proskuneo ku ta karga e mesun nòmber ku e musical, esta: Pasobra Dios a stima mundu.
Hopi bida a wòrdu toká pa motibu di e amor i grasia di Dios. Di bèrdat nos ta konfia ku esaki tabata un biahe ku a kambia bidanan.
Den e kompilashon di foto por mira un impreshon di e musical.
Kantidat limitá di e CD Pasobra Dios a stima mundu ta optenibel na Iglesia House of Worship, Erosweg 52.