Parlamentario Eduard Braam a keda aserka pa piskadónan di Shut kende ta indiká ku bashamentu di awa di berpùt na shut a bolbe lanta kabes

Parlamentario Eduard Braam a keda aserka pa piskadónan di Shut kende ta indiká ku bashamentu di awa di berpùt na shut a bolbe lanta kabes i esaki ta un estorbo pa e piskadónan por hasi nan trabou diario. Ta trata di un problema eksistente pa hopi aña i mester yega na un solushon permanente riba esaki.

Banda di esaki Kòrsou ta afiliá pa medio di tratadonan internashonal pa ku kuido di medio ambiente. Esaki ta motibu pa kua diferente barku ku tambe ta parti di e tratadonan aki, no ta deshasí di nan awa shushi riba laman, sino ta hasi esaki pa medio di trùknan ku ta duna e servisio aki.

Aparte di e situashon di piskadonan tin mas aspekto ku ta hasi e tópiko aki intresante ya ku resientemente durante konferensia di IPKO e kompania Bluerise a duna presentashon di e “eco park” ku nan kier konstruí den e área i si esaki kana segun prosedura i bira realidat, nan tambe ta eksigí un awa limpi.

Relashoná ku esaki Parlamentario Braam, kier lansa e siguiente preguntanan na minister enkargá ku e problemátika aki, kual ta minister di salubridat.

1. Kon a para ku e “opvang instalatie” ku a keda konstruí na Shut?
2. Ta e intenshon ainda pa Curaçao Airport Holding sera e área di “Shut” pa trùk?
3. Materialnan pa sera e kaminda aki, ya e keda atkerí?
4. Banda di trùk bo tin hende ku ta bai tira shushi di kas, a tuma akshon kontra di esaki manera a indiká?
5. E “tussenstop” na Klein Hofje ta funshoná?
6. Te kon leu esaki por akapará e trùknan ku ta dùmp na Shut?
7. DOW tin e personal nesesario pa atendé ku e planta na Shut?
8. E kantidat di trùknan ku ta bai dùmp awa shushi na shut, shut por akapará esaki?
9. E trùknan ku ta traha pa barkunan ku ta pasa den nos haf, kon ta para ku e awa shushi ku nan tin ku dùmp?
10. Finalmente tabatin e plan pa pone e “eco park” na shut. Esaki ta den liña di maneho di gobièrnu i ta teniendo kuenta ku e esaki lo no ta posibel si ta dùmp awa shushi den e área aki?