Hopi titulo i poko hende. Intelektualidat ta kabando ku nos.

Hopi titulo i poko hende. Intelektualidat ta kabando ku nos.

Den e époka aki nos boka ta yena ku tèrminonan intelektual, títulonan dilanti di nòmber, universidatnan na kua nos a studia, kua método ta mihó pa splika matemátika etc. Tur enfoke ta riba formashon di e intelekto. Nos ta lubidando ku hende no ta solamente un ser intelekto. E ser hende ta un ser spiritual i sosial tambe, i solamente si kada unu di e áreanan aki ta desaroyá nos ke papia di un hende balansá.
Na tur mi rumannan ku ta kreyente , si bo kreensia ta instruí bo di stima bo próhimo i tin kompashon ku otro no tene bèrgwensa sino práktika bo fe. Paso den un pais kaminda tin asina tantu divishon ta reina ta mas amor i kompashon, humildat, toleransia pa ku otro nos tin mester. Spiritualidat ta un realidat i nos lo sigui mira ku miéntras nos sigui neglishá e parti aki den formashon di hende nos lo sigui forma profeshonalnan ku defisiensia.
E aspekto sosial ta unu di gran importansia. Kon nos ta kombibí ku otro ki balor nos ta duna nos próhimo. Kon importante rèspèt ta pa nos. Si bo konsiderá ku no ta nesesario pa stima tur hende por lo ménos mi ta hasi apelashon riba rèspèt den nos komunidat. Rèspèt un pa otro. Sin distinshon di edat,kredu òf rasa. Rèspèt ta kuminsá den nos kasnan. I ta keda transmití di mayor pa yu. Di e mesun manera ku un mayor ta rèspètá su yu e yu ta rèspètá un otro pafó di kas.
Mi ta ninga di aseptá ku nos balornan a bai pèrdí. Pero kon nos lo por salbaguardiá nan si nos enfoke ta keda e formashon intelektual di hende? Nos ta kreando un komunidat intelekto miéntras nos famianan ta kibrando. Miéntras nos komunikashon a kambia pa agreshon. Nos no ta skucha otro mas i asta ke tapa otro su boka. Nos ego ta kabando ku nos pais. E stèm den nos kabes ku ke laga nos kere ku nos ta mas ku nos ruman i ku ta nos so tin un agènda.
Kòrsou lanta riba pone nos kabes na pareu ban pone atenshon na e individuo den tur su aspektonan. Den eksterior a introdusí ‘práktika restorativo’ pa koregí mal komportashon. E práktika aki por keda ehekutá den famia, skolnan i tambe den Ministerio di hustisia. Esaki ta un método ku ta hasi e outor reflekshoná riba su akto i ta proba ku ta den 1% di kaso so e outor ta ripití e akto aki. Kiko nos ta warda pa introdusí esaki den nos skolnan?
Ban sostené vínkulo familiar. Pone énfasis riba formashon sosial emoshonal hinkando mas trahadó sosial den skolnan, pusha modelonan positivo den lus i kada un di nos ser rolemodenan pa nos muchanan. E tarea aki no ta di otro e ta di nos tur.