Kaminda pa bai Wespen lo ta será pa tráfiko un dia mas pa terminá trabounan di asfaltamentu

Kaminda pa bai Wespen lo ta será pa tráfiko un dia mas pa terminá trabounan di asfaltamentu

Willemstad – Obra Públiko ta pidi esnan ku ta trafiká mas tantu den área di Wespen pa tene kuenta ku e kaminda menshoná lo ta será riba djárason dia 22 di mart tambe, entre 7’or di mainta i 5’or di atardi pa tráfiko motorisá. Pa bai direkshon di Wespen por hasi uso di e ruta Soto – Santa Cruz – Lagun – Kenepa i pa bai pariba mester usa e direkshon kontrali. Obra Públiko ta pidi tur hende tambe pa tene kuenta ku e trabounan ku ta tuma lugá riba e kaminda i pa kore ku koutela.

Obra Públiko di Ministerio di Tráfiko, Transporte i Planifikashon Urbano den koperashon ku e kompania Aliansa Civil & Road Works a kuminsá e siman aki ku trabounan di asfaltamentu riba parti di e kaminda pa bai Wespen ku ta entre Wacawa i Savonet. E trabounan tabata kalkulá pa tuma lugá riba djaluna i djamars. Debí na algun punto imprevisto ku a okashoná trabou èkstra e kaminda ta keda será pa un dia mas.

Segun skema riba djaluna i djamars lo a pone e kapa mas abou di asfalt pa despues pone un kapa final un siman despues. Ora e trabounan a kuminsá a resultá ku e fundeshi tin muchu buraku. Pa evitá ku vehíkulonan motorisá por okashoná daño na e promé kapa, a tuma e desishon pa drecha e burakunan promé i pa djárason sigui ku bashamentu di e kapa di asfalt. E desishon aki sigur ta hasi ku e karetera ta keda den bon kondishon pa un periodo hopi mas largu. Obra Públiko ta pidi despensa pa e molèster ku e dia èkstra aki ta kousa.

This site uses Akismet to reduce spam. Learn how your comment data is processed.

error: Content is protected !!
%d bloggers like this: