Kámara di Komèrsio ta sigui brinda empresarionan plataformanan pa por ekspandé nan negoshi

Kámara di Komèrsio ta sigui brinda empresarionan plataformanan pa por ekspandé nan negoshi

WILLEMSTAD –Kámara di Komèrsio i Industria di Kòrsou resientemente a organisá e eksitoso konferensia Curaçao Business Point Conference 2017. E konferensia a dura hinter un dia ku numeroso presentashon i workshop na enkargo di vários moderadó internashonal di vários pais den nos region. i a ser bishitá pa un kantidat grandi di empresario i personanan ku tin idea di inisiá un kompania. Enfoke di konferensia ta pa prepará empresarionan lokal pa por amplia nan ‘scope’ di hasi negoshi pa merkadonan internashonal.
Billy Jonckheer, presidente di Kámara di Komèrsio, den su diskurso na apertura di e konferensia a pone atenshon hustamente na e aspekto aki. “Awendia ta di sumo importansia pa bo invertí den bo konosementu di merkadonan internashonal. No opstante ku tin hopi reto, nos mester ta konsiente di oportunidatnan tambe. Durante mi bishitanan di trabou na paisnan grandi den Sur Amérika, konstantemente mi ta ser aserká pa kompanianan ku ke traha aliansa pa hasi negoshi ku, i via Kòrsou. Mi por menshoná por ehèmpel ku nos ta únikamente un ora di buelo di Colombia ku tin 47 mion konsumidó. E paisnan tur ta interesá den Kòrsou komo nos ta parti di Reino Hulandes i via Kòrsou ke tin un entrada mas direkto na Europa. Meskos mi por informá ku nos ta parti di Caribbean Basin Initiative (CBI), ku ta pone nos den e posishon di por eksportá liber di impuesto pa merkado di Estádos Unídos. Otro bentahanan ku nos tin ta ku nos tin afinidat ku e kulturanan i ta komuniká den diferente idioma,” Jonckheer a bisa.
Aña pasá Kámara di Komèrsio a lansa e website CuracaoBusinessPoint.com komo un plataforma pa kompartí informashon di empresanan lokal na merkadonan internashonal. “Nos ta enkurashá empresarionan lokal pa registrá pa e plataforma i eksponé nan profil di negoshi na mundu. Nos ta notando ku mas i mas negoshi lokal ta mira e benefisio di hasi negoshi internashonal. Prueba di esei ta e kantidat di empresario presente na Curaçao Business Point Conference 2017.
E moderadónan internashonal ku tabatin na nan enkargo e presentashon i workshopnan ta Adrian Reid di Barbados, Donald Demeritte di Bahamas, Jan Willem Bokhove di Hulanda/Colombia, Jeff Stay di Estádos Unídos, John Sandford di Sint Maarten, Maarten Hendriks di Hulanda i Michael Seepersaud di Jamaica. Alabes e empresarionan lokal Anne Zeeman, Edward van Heiningen i Renato Ignacio a kompartí nan eksperensia di ta hasiendo negoshi ku I na Colombia.
A duna informashon di temanan manera e.o. Kiko ta un incubator, Importansia di Networking, , Kon pa set up un proyekto pa Crowdfunding, Kon prepará bo negoshi pa por eksportá, Kon pa promové bo negoshi via Social Media, Kon traha i desaroyá un plan di merkadeo pa eksportashon, Formanan inovativo pa finansiá empresanan chikí i mediano.
Billy Jonckheer finalmente a informá ku Kámara di Komèrsio lo kontinuá organisá e tipo di eventonan manera Curaçao Business Point Conference 2017 pa nos empresarionan por sigui ekspandé nan konosementu.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: