Orashon djaluna 8 di mei 2017
Orashon djaluna 8 di mei 2017
E apòstelnan i e rumannan na Hudea a tende ku hende no hudiu tambe a aseptá palabra di Dios. Ora Pedro a bai Herusalèm, e kreyentenan ku a risibí sirkunsishon a atak’é bis’é: ‘Bo a drenta kas di hende ku no a risibí sirkunsishon i kome ku nan.’ Pedro a tuma palabra i splika nan na plaka chikí loke a pasa: ‘Miéntras mi tabata resa den e siudat Yope, mi a haña un vishon. Algu ku tabata parse un laken grandi tabata bini abou for di shelu; a fir e na su kuater puntanan te ora el a yega serka mi. Ora mi a wak bon den dje, mi a mira bestia ku kuater pata, bestia feros, bestia ku ta lastra abou na suela i para. Anto mi a tende un stèm bisa mi: “Ban mira, Pedro, mata bo kome!” Mi a rospondé: “Di ningun manera, Señor! Nunka nada ku ta indigno òf impuru no a drenta mi boka!” E stèm a zona pa di dos be for di shelu i kontestá: “Loke Dios a deklará puru, abo no mester konsiderá impuru.” Esaki a sosodé tres be, i despues a hala tur kos bèk den shelu. Na mes momento tres hòmber, mandá for di Sesarea pa buska mi, a yega e kas kaminda mi tabata keda. Spiritu Santu a bisa mi pa mi bai ku nan sin basilá. E seis rumannan akí a kompañá mi pa Sesarea i nos tur a drenta kas di Kornelio. El a konta nos kon el a mira un angel den su kas, ku a bis’é: “Manda hende Yope bai buska Simon, tambe yamá Pedro. Lo e duna bo un mensahe ku lo sirbi pa abo i henter bo famia haña salbashon.” I ora mi a kuminsá papia, Spiritu Santu a baha riba nan meskos ku El a baha riba nos promé. E ora ei mi a kòrda ku Señor a bisa: “Huan tabata batisá ku awa, ma boso lo ta batisá ku Spiritu Santu.” Si Dios a duna nan pues e mesun don di Spiritu Santu ku El a duna nos, ku ya tabata kere den Señor Hesu-Kristu, ta ken ami ta e ora ei pa kita Dios di hasié?’ Ora nan a tende loke el a konta, nan a keda satisfecho i a alabá Dios, bisando: ‘Ke men Dios a duna esnan ku no ta hudiu tambe e oportunidat pa kombertí sigui Dios i haña bida!’
Echonan 11:1-18
