Djaweps dia 11 di mei Su Ekselensia Gobernador di Kòrsou, a pidi sr. Eugène Rhuggenaath pa e pasa awor na forma un gabinete ku tin sosten di e partidonan polítiko PAR, MAN i PIN, partidonan ku dia 10 di mei 2017 a yega na un akuerdo di gobernashon

Willemstad, 14 di mei 2017

Djaweps dia 11 di mei Su Ekselensia Gobernador di Kòrsou, a pidi sr. Eugène Rhuggenaath pa e pasa awor na forma un gabinete ku tin sosten di e partidonan polítiko PAR, MAN i PIN, partidonan ku dia 10 di mei 2017 a yega na un akuerdo di gobernashon.

A base di e enkargo akí di Gobernador, sr. Rhuggenaath a papia ku e ministernan kandidato i a enkaminá e proseso di screening manera esaki ta deskribí den e lei ‘Landsverordening integriteit (kandidaat) ministers’. Tur e kandidatonan pa bira minister a kompletá, firma i entregá un deklarashon ‘verklaring toestemming onderzoek kandidaat-minister’. Ku esaki nan ta duna outorisashon na e diverso instansianan pa realisá tur investigashon relevante. Ta trata di kuater investigashon: un investigashon hudisial ku Ministerio Públiko ta hasi, un investigashon di seguridat nashonal ku ‘Veiligheidsdienst Curaçao’, ta realisá, un investigashon den asuntunan di belasting realisá pa Inspektor di Belasting i un investigashon médiko via ARBO Consult.
E proseso di screening ta ensera tambe un investigashon transakshonnan inusual di parti di MOT (onderzoek naar ongebruikelijke transacties).
Kada kandidato mester entregá pa e investigashon médiko un deklarashon di nan dòkter di kas, for di kua mester resultá ku no tin opstákulo pa ehekutá e funshon di minister. E investigashon médiko mester enserá tambe uso di droga prohibí registrá den e lei ‘Opiumlandsverordening 1960’. A pidi kada kandidato pa minister i miembronan di su famia pa entregá un deklarashon por eskrito den kua nan ta duna informashon tokante nan situashon finansiero.

E proseso di screening di e formadó mes, ta tuma lugá di akuerdo ku e ‘Landsverordening’ (lei), a petishon di visepresidente di Hunta di Konseho (Raad van Advies), komo e formadó ta e minister-presidente aspirante, ke men ku e ta tambe kandidato pa bira minister. Entre tantu e formadó a aserká tur instansia pa pidi nan kooperashon pa laga e proseso di screening kana zetá.

Pa sera konosí i un kòmbersashon, tur kandidato pa minister a pasa djabièrnè i djasabra pasá serka formadó. Djabièrnè mèrdia tabatin bishita di MAN, djasabra tabata di bishita e kandidatonan na nòmber di PIN i PAR. A papia tambe ku e kandidato pa minister plenipotensiario interino. E kòmbersashon ku e minister plenipotensiario aspirante lo tuma lugá via Skype.

Pa ehekushon di e enkargo di formashon, e formadó a pidi e tim di sosten di informadó, inkluso señor Etienne Ys pa sigui duna sosten. A informá Gobernador ku sr. Rhuggenaath ta studiando e enkargo di formashon i a entregá gobernador kopia di e deklarashon ku e miembronan di Parlamento di PAR,MAN i Pin a firma, den kua nan ta indiká ku nan ta di akuerdo ku e akuerdo di gobernashon. E proseso di formashon ta sigui djaluna 15 di mei 2017.

Eugène Rhuggenaath
Formadó

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: