Parlamentario pa frakshon di partido MAN Eugène Cleopa ta felisitá tur empleado públiko riba nan dia.
Tópiko: dia di empleado públiko
Meskos ku tur dia importante ku ta wòrdu selebrá i homenahiá nos tin tambe awe unu ku ta mesun importante òf hopi importante ku ta e dia ku ta selebrá dia di e empleado públiko.
Tin yen filosofia rondó di kon kada ken ta mira e trabounan di un ámtenar. Ami komo un ámtenar sa kon importante i valioso e servisionan di e empleado públiko ta.
E empleado públiko ta duna servisio na tur sektor, na tur gremio i tambe na tur hende den nos komunidat i tambe na nos bishitantenan.
Gobièrnu su éksito ta determinante dor di e kalidat di servisio di nos empleadonan públiko. Apesar ku nos por drecha nos servisionan aun mas tantu na e komunidat, mi ta di opinion ku nos empleadonan públiko ta haña bastante krítika infundá i inkorekto. E hecho komo ámtenar ku bo no por sali i reakshoná den publisidat ta pone ku e imágen di empleadonan públiko ta keda den un esfera ménos positivo. Ta p’esei mi ta gusta e últimamente desaroyonan kaminda e servisio di e respektivo ministerionan ta bai programanan radial i di TV kaminda e ámtenar ta splika kiko nan trabou i nan servisio ta konsistí di dje.
Un ámtenar hopi biaha ta resistente pa strès, pasombra konstantemente e ta traha bou di strès, prinsipalmente ora tin kambio di gobièrnu kaminda hopi aktividat inhustu ta pasa ku i/òf rondó di nan. Ehemplo di esaki ta ora ku nombramentunan polítiko ta wòrdu establesé manera ora un hende di un forma infundá ta haña un skal mas haltu ku un (futuro) kolega ku tin hopi aña di eksperensha. Un otro un ehèmpel ta un trahadó públiko ku ta traha ku kliente direkto hopi biaha ta haña zundrá pa akshonnan i responsabilidatnan di un otro.
Apesar di e retonan ku mi a kaba di menshoná akiriba mi ta sumamente orguyoso ku mi ta un empleado públiko. Mi afan meskos ku mayoria di mi koleganan ta pa nos sigui duna bon servisio.
Mi lema ta: NOS TEI PA SIRBI, SINO NOS NO TA SIRBI PA TEI.
Un pabien kaluroso ta bai pa tuuuuuuuuur e empleadonan públiko riba e dia tan speshal aki. Laga nos ban reflehá i sabi kon importante i esensial nos trabou komo ámtenar ta.
Felis dia
Eugène Cleopa, frakshon di partido MAN
