AMAK I RADIO ACTIVE 104.5 FM A ENTREGA PLAKAT DI MÉRITO NA MVR. KROES
AMAK I RADIO ACTIVE 104.5 FM A ENTREGA PLAKAT DI MÉRITO NA MVR. KROES
WILLEMSTAD – Un dje personalidatnan ku a nifiká hopi pa kultura di Kòrsou ta Sra. Jeanette Kroes kende a nanse 1 di mart di aña 1929. E ta mas konosí komo Mvr Kroes.
Ta un dosente ku a yuda forma masha hopi pianista mes na Kòrsou. E ta dunando lès na Muziekschool for di 2 di Sèptèmber di 1974 kua ta nifiká 43 aña den servisio. El a duna lès na mas ku 500 mucha na tur den e 43 añanan ku e tin komo dosente.
Su tòp studiantenan ta Randell Corsen kende un i tur sa kon el a desaroyá su karera den músika despues di a bai Hulanda i gradua. Tin tambe Jahier Konter ku tambe a kaba konservatorio na Hulanda. Den kaso di Jahier Konter e ta dunando lès aworakí na konservatorio na Hulanda.
Otro studiante di dje ku sigur a sabi na profilá den farándula di Kòrsou ta Linmarvin Martina. Otro di su studiantenan ku a kue tur e gradonan serka dje pa loke ta piano ta abogado mr. Karyl Bertrand.
Hopi ta e pianistanan ku el a sabi na forma atraves di 43 aña I manera bisa mas ariba ta trata di mas ku alumno ku a pasa den su man.
Sherwin Faneite kende ta kondusí e programa di farándula E Mulina Farandulero na Radio Active 104.5 FM a tuma nota di e kontribushon grandi di Mvr Kroes i den e kuadro aki el a disidí pa den su programa na Radio Active a dun’é un plakat di mérito.
Ayera di forma sorpresivo e tabata presente den studio di Radio Active, paso e no tabata sa kiko ta e okashon. Ku hopi humildat i emoshon el a risibí su plakat di mérito ayera i mester bisa ku famia di Mvr Kroes a apresiá hopi e rekonosementu ku a duna e gran baluarte.
E plakat di mérito a keda entrega pa Manfred Gomes kende ta presidente dinámiko di AMAK kende ku hopi honor a aseptá e invitashon pa ser esun ku a entreg’é esaki.
Mester bisa ku apesar di Muziekschool ta asina ku Mvr Kroes ta toka den 3 diferente misa for di 1964. Ainda e ta toka den misa 2 biaha pa siman. Ántes tabata 4 biaha pa siman.
Amak ta felisitá Sherwin Faneyte p’ echo ku atraves di su programa E Mulina Farandulero por a duna e homenahe meresí aki na Mvr Kroes. AMAK ta felisitá Mvr Kroes ku su rekonosementu bon meresí.. Tambe AMAK ta gradesi Julius Koko i Sherwin Faneyte pa e inisiativa aki.
Atentamente
Direktiva di AMAK