Gobièrnu di Kòrsou a dekretá luna di sèptèmber komo Luna pa nos Grandinan

Gobièrnu di Kòrsou a dekretá luna di sèptèmber komo Luna pa nos Grandinan

Ayera, sra. Geselle Rosaria – Coffi, presidente di Fundashon Nos Grandinan, a risibí for di man di Su Ekselensha sra. Drs. Marilyn Alcalá – Walle, e dekreto pa loke ta trata luna di sèptèmber ku lo bira e “Luna pa demostrá Apresio i Gratitut na nos Grandinan”. Varios pais i isla rond mundu ya tin nan luna pa grandinan i tambe un dia nashonal pa nan sentenarionan. Den pasado, Fundashon Nos Grandinan a aserká gobièrnunan na turno pa proklamá e luna pa nos grandinan i tambe un dia nashonal pa nos sentenarionan, mirando ku riba e pida baranka aki di 444 km², nos ta riku na 63 persona ku tin 100 aña òf mas ku ta hopi. Fundashon Nos Grandinan ta hopi agradesido ku sra. Alcalá i tambe Gabinete Rhuggenaath den su totalidat a mira e importansha pa establesé un luna pa nos grandinan aki na Kòrsou tambe. “Luna pa Nos Grandinan” ta kuminsá promé di sèptèmber i ta kulminá promé di òktober ku ta dia Internashonal di Hende Grandi. Tambe, Gobièrnu di Kòrsou a ratifiká e di dos djadumingu di luna di sèptèmber komo Dia di (Ta)Wela, manera proklamá pa Kolegio Ehekutivo di Teritorio Insular di Kòrsou riba 31 di ougùstùs 2007. Por último, Gobièrnu di Kòrsou a proklamá tur di tres djadumingu den luna di sèptèmber komo Dia Nashonal pa Sentenarionan. E piedra ku gabinete Rhuggenaath a pone pa nos grandinan lo bai den historia! Ta un logro grandi pa nos grandinan i di e forma aki Gobièrnu di Kòrsou a dal e promé stap pa e kambio real na bienestar sosial di nos grandinan. Komunidat kompletu lo wòrdu involukrá pa huntu nos duna atenshon real na nos grandinan 30 dia largu den luna di sèptèmber próksimo. Mester remarká ku den luna di sèptèmber tin siman di limpiesa i tambe siman di kultura ku tambe lo haña hopi atenshon di parti Fundashon Nos Grandinan i tambe Gobièrnu di Kòrsou. Finalmente, Direktiva di Fundashon Nos Grandinan ta hopi agradesido na e hecho ku Gobièrnu di Kòrsou ta rekonosé Fundashon Nos Grandinan komo e instansia ku ta boga pa bienestar sosial di nos grandinan, motivando Kòrsou kompletu pa duna atenshon, balor, amor i rèspèt na nos grandinan.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: