Porfin por selebrá 10 di òktober, dia di Outonomia di Kòrsou.

Porfin por selebrá 10 di òktober, dia di Outonomia di Kòrsou.

Ku plaser frakshon di PAR a tuma nota ku Minister President Rhuggenaath i Minister di Enseñansa Alcala Walle a proklamá i ratifiká e fecha di 10 di òktober komo dia di Outonomia di Kòrsou. I alabes ta hasiendo e trabounan pa selebrá e fecha aki en grande.

Ta frakshon di PAR su konvikshon ku den kuadro di selebrashon di nos Identidat Nashonal, pone enfasis riba nos outonomia ta un paso importante pa fortalesé nos komunidat. Segun statuto di Reino Hulandes, komo Pais Outónomo den Reino, Pais Kòrsou por reglá maneho interno di forma independiente for di e otro Paisnan den Reino. Asina mes dunando espasio tambe pa kolaborashon ekstenso ku paisnan den Reino Hulandes i otronan.

Na 10-10-10 Kòrsou a laga atras e konstelashon di Antiyas Hulandes. Konservando lasonan di hermandat i fraternidat ku kada un di e paisnan aki. E laso nan historiko i familiar ku Kòrsou konosé ku Bonaire, St. Maarten, Saba i St. Eustatius nunka lo no disparsé. Al kontrario den e orden hurídiko nobo di Pais Kòrsou por fortifiká e lasonan aki aun mas. Areanan ekonómiko, sosial, kultural i turístiko ta algun ku lo por desaroyá mas den profundidat.

Segun frakson di PAR nasementu di Kòrsou a kuminsá ku su retonan. Ta di lamentá ku e gobiernu en turno no a sa di hasi uso di e oportunidat ku Pais Kòrsou a nase ku n’é. Asina aki stankando nos desaroyo. Tambe nan a faya di duna e fecha di 10 di òktober su luga meresí.

Ku e proklamashon di gabinete Rhuggenaath ku dia 10 di òktober ta dia di Outonomia di Kòrsou realmente nos por selebrá aun mas nos identidat komo Yu di Kòrsou, esaki banda di tur e otro simbolonan di identidat ku Pais Kòrsou ta konosé manera entre otro nos himno i bandera.

Tambe frakshon di PAR ta aploudí ku a dekretá e dia di 10 di òktober un dia liber di komersio, pa asina por garantisá ku tur suidadano ta liber pa gosa di e dia. Frakshon di PAR ta invitá un i tur pa nos ban selebrá nos simbolo nan di identidat nashonal, asina aki hasiendo Kòrsou grandi, ku e speransa di union i pas.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: