Investigashon relashoná ku konstrukshon di Hospital Nobo na Otrabanda (HNO)

Na:      Lidernan di Frakshon den Parlamento

Wilhelminaplein # 4

PRESENTE

 

Sra. A. Pauletta

Sra. E. Rozendal

Sr. R. Calmes

Sr. M. Dossantos

Sra. M. Mozes

Sr. H. Cordoba

 

Tópiko: Investigashon relashoná ku konstrukshon di Hospital Nobo na

 Otrabanda (HNO)

 

Kòrsou, 11 di mei 2018

 

Apresiabel Lider nan di Frakshon,

 

Pa medio di e karta aki, frakshon di MFK ta aserka bosnan ku lo siguiente;

Durante di e último lunanan ku a transkurí Minister enkargá ku GMN a trese akusashonnan serio dilanti pa ku e konstrukshon di HNO. Esaki a pone ku Parlamento a invitá e diferente aktornan den konstrukshon di nos HNO pa Parlamento por skucha nan tambe i dispone di sufisiente informashon relashoná ku e aspektonan finansiero i tékniko pa ku konstrukshon di HNO.

Frakshon di MFK mester bisa ku ta un echo ku e kambio di e sitio di konstrukshon di HNO i tambe e mal maneho hiba den konstrukshon di HNO, ta resultado awe ku e aspekto finansiero tabata un debakel ku lo bo bai pisa riba presupuesto di gobiernu di Kòrsou i ku lo tin su konsekuensianan tambe pa e tarifa na públiko ku HNO lo mester bai apliká.

Di parti di Minister di  GMN a bin un proposishon noble dilanti, pa gobiernu lanta un komishon di tres eksperto kaminda oposishon den Parlamento lo nombra un eksperto, koalishon den Parlamento lo nombra un eksperto i gobiernu (lesa Minister di GMN) lo nombra un eksperto komo presidente pa bai investigá hinter e trayekto di konstrukshon di HNO.

Teniendo na kuenta ku Parlamento ta un instansia outónomo i ku Parlamento ta esun ku ta dispone di e asina yama “Budget Recht”, frakshon di MFK no por haña su mes den e proposishon di Minister Camelia- Römer pa gobiernu bai investigá e trayekto di konstrukshon di HNO.

Si bai di akuerdo ku e proposishon aki, nos mes komo miembro di Parlamento ta trapa riba derechinan ku tantu Areglo di Estado komo Reglamentu di Ordu ta brinda na Parlamento pa ehersé kontrol riba gobiernu.

Ta tarea di Parlamento pa kontrolá gobiernu (lesa Ministernan) i no ta tarea di gobiernu (lesa Minister di GMN) pa bin ku un komishon di tres eksperto kaminda Parlamento mester apuntá dos miembro, pa bai laga investigá desishon ku Minister nan a tuma den pasado o aktual. E embergadura di e konstrukshon di HNO ku un kosto adishonal di mas o ménos 75 mion florin, ta un kaso hopi serio i Parlamento mester asumí su responsabilidat.

Basa riba e puntonan ariba menshoná frakshon di MFK ta aserka frakshonnan den Parlamento pa sa si tin disponibilidat pa aktivá artíkulo 107 di Reglamentu di Ordu pa Parlamento.

“Een voorstel tot het instellen van een onderzoek (enquête), ingevolge artikel 59 van de Staatsregeling , moet schriftelijk worden ingediend, hetzij door een commissie uit de Staten naar aanleiding van een bij haar in overweging zijnde onderwerp, hetzij door een of meer leden”

Pa asina Parlamento inisiá ku un investigashon outónomo riba e trayekto di konstrukshon di HNO, nos ta spera di por risibí un kontesta riba término korto di kada frakshon.

Pa asina huntu e 21 miembronan ku ta konformá Parlamento por fiha un fecha pa inisiá konforme lei e trayekto pa un investigashon riba konstrukshon di HNO.

 

Atentamente,

 

Gilmar Pisas

Lider Interino di

Frakshon di MFK

Kopia pa;

  • Gobernador di Korsou
  • Presidente di Parlamento di Korsou
  • Gobiernu di Korsou
  • Kontrolaria General di Korsou

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: