Mara Lensu su kompetensia lo tuma lugá den Hòfi Fidel

 

Djadumingu awor, 31 mart lo tuma lugá e tradishonal Mara Lensu 2019, organisá pa Fundashon Kultural Seú Kòrsou, bou di enkargo di Shurendi Pieternella i su team.  

Un total di 21 partisipante lo bai kompetí e aña aki. Despues di dos dia di tayer pa asina por a haña tur klase di konosementu serka profeshonal nan den Mara Lensu, e 21 partisipantenan aki ta kla pa duna un tremendo espektákulo di kompetensia. E tayernan a wòrdu duna dor di Doña Elia Isenia, sra. Myrugia Ignecia i sr. Shurendi Pieternella.

Lo bai tin 5 kategoria di Mara Lensu, ku ta Lensu Propio, Lensu Afrikano, Lensu MCB, Lensu UTS i Lensu Landsloterij.

Djadumingu tur kos lo kuminsá for di 12’or di mèrdia ku benta di kuminda, pa 2’or lo kuminsá ku un show di apertura presentá pa grupo di baile D’Art, durante di showtime lo tin aktuashon di grupo Rítmiko SABLIKA i Grupo Kompèr. Entrada lo ta fl. 3,– pa persona.  

E 21 partisipantenan pa e dia aki lo ta : Edtline Jops, Rosemarie Cijntje, Solange Bentura, Ayshenou Bentura, Magiola Barbara, Marla Borgschot, Christine Dania, Marvis Alberto, Lysette Pinedo, Percis Mercera, Helen Doran, Terrence Selassa, Lucilla Selassa, Monique Pengel, Admaida Selassa, Jeanahaira Dossett, Noe-Amy Maria, Syonara Maria, Eugenique Wilkens, Valeskka Felipa i Sandra Kook.

Fundashon Kultural Seú Kòrsou ta invitá hinter pueblo di Kòrsou pa bin apoyá i sostené nos partisipantenan den e Kompetensia Mara Lensu 2019, dia 31 mart for di 2’or di mèrdia te ku 8’or di anochi na Hòfi Fidel.

“Kosecha propio, rikesa di un pais”