Djasabra dia 5 di òktober; “Mi’n Ta Entregá”…… LILLY GOODMAN NA KȮRSOU Un di e bosnan mas impreshonante den músika gospel…
Djasabra dia 5 di òktober; “Mi’n Ta Entregá”……
LILLY GOODMAN NA KȮRSOU
Un di e bosnan mas impreshonante den músika gospel…
WILLEMSTAD:- Ayera atardi medionan di komunikashon a keda invitá na Harbor Hotel na Otrobanda pa un konferensia di prensa di manera ku huntu por duna Kòrsou e bon notisia. Despues di algun dia di espektativa Rapido Promotions ta anunsiá e konsierto “Mi’n Ta Entregá” ku presentashon di Lilly Goodman! Djasabra 5 òktober próksimo lo bira realmente grandi i bendishoná pa Kòrsou. Portanan di Curacao Airport Dome lo habri pa 7’or di anochi di manera ku por kuminsá akomodá e públiko ku lo bini huntu ku un solo meta; alsa e nòmber di Dios, gradisié pa su bondat, i pidi su protekshon. Riba e anochi aki no tin distinshon di rasa, koló, status sosial, ni gremio; Kòrsou lo ta un! No ta importá e reto ku tin bo dilanti, nada ta mas grandi ku Dios su amor p’abo! Ta p’esei, no entregá. E tema “Mi’n Ta Entregá” ta resoná serka nos tur.
Lilly Goodman ta bon konosí na Kòrsou pa su éksitonan manera “Al Final”, “Cúbreme” i e mas resiente éksito zonando na radionan lokal “Soy Sana”. Vários tabata nos artistanan lokal ku a bin ta ‘cover’ e kantante. Lilly Goodman di 43 aña di edat ta é kantante di músika kristian mas importante den género musikal ‘Gospel Latino’ p’e merkadonan di Merka, Latinoamérika i Europa. Ademas, e ta ganador di diferente premio e.o Grammy i Cassandra. E konsierto ta tuma lugá na Curaçao Airport Dome, kual ta e kompleho nobo pa organisá evento, e ta sumamente espasioso i airekondishoná, situá nèt dilanti e kuebanan di Hato. Huntu ku Lilly Goodman i su ministerio konsistiendo di 10 músiko, lo tin presentashon di Zamar ku riba e anochi di 5 di òktober aparte di su propio elenko artístiko lo kompañá tambe kantantenan lokal Angelique Klooster, Liesella Thomas, Veanira Reed i tambe rumannan Liesje i Tania Isenia.
Un dia di benta ku karchi na preis spesial:
For di momentu ku den fin di siman e anunsio a kore riba medionan sosial ku pronto Lilly Goodman lo ta na Kòrsou, a surgi un gran interes pa su presentashon. Netamente p’esei Rapido Promotions ta hasi un gesto spesial. Djasabra próksimo dia 17 di Ougùstùs únikamente na Ticketpoint pegá ku Building Depot na Zeelandia, for di 9or di mainta te na momento ku esakinan kaba, lo bende karchi di entrada pa e konsierto aki na e preis spesial di Fl. 45,–. Ta bon pa remarká ku ta solamente riba e dia aki lo bendé e karchi na preis spesial, p’esei yega trempan pa bo tin bo karchi den bo man! Entrante djaluna 19 ougùstùs lo kuminsá bende karchi na e preis ofishal di Fl. 60,– na e puntonan di benta Ticketpoint Zeelandia, Mensing’s Caminada, 24 Uur na pòmp di gasolin Santa Maria i tur filial di Pagafasil
