Karta di Parlamentario Curtley Obispo dirigi na Minister di Salubridat, Medio Ambiente i Naturalesa, señora Susanne Camelia-Römer ku tópiko: Status di kuenta anual 2017 di Analytisch Diagnostisch Centrum NV.

Minister di Salubridat, Medio Ambiente i Naturalesa

Señora Susanne Camelia-Römer

Fort Amsterdam # 17

Presente

Djaweps, 4 aprel 2019

 

Tópiko:  Status di kuenta anual 2017 di Analytisch Diagnostisch Centrum NV

 

Apresiabel señora Minister Susanne Camelia-Römer,

Duna kuenta i rason na tempu ta konta tambe pa kompanianan anónimo ku Pais Kòrsou tin akshon aden. Tur kompanianan anónimo ku Pais Kòrsou tin akshon aden, segun nan statutonan i tambe lei di Corporate Governance, mester kumpli i entrega tur aña na tempu nan kuenta anual audita (“gecontroleerde jaarrekening”) i raporta over di funshonamentu di Corporate Governance na nan akshonista ku ta Pais Kòrsou kual ta wòrdu representá dor di Gobièrnu di Kòrsou.

Aña pasa riba 14 sèptèmber 2018, nos Frakshon di PAR den Parlamento di Kòrsou den un komunikado di prensa a indiká ku entre otro i mi ta sita: “Gobièrnu di Kòrsou mester sigui motivá su kompanianan anónimo i fundashonnan pa nan entrega nan kuenta anual te ku 2017 na tempu den aña 2018. No ta aseptabel ku ainda tin sierto kompanianan anónimo i fundashonnan di Gobièrnu ku no a entrega nan kuenta anual te ku aña 2017. Kompanianan i fundashonnan di Gobièrnu di Kòrsou mester ta responsabel i mester duna kuenta i rason den ménos ku seis (6) luna despues di e aña 2017 na Gobièrnu. Den aña 2019 nos ta spera ku kompanianan òf fundashonnan di gobièrnu lo sòru di kumpli i entrega nan kuenta anual 2018 promé ku 1 yüli 2019”.

Den e Rapòrt di Maneho Finansiero di Pais Kòrsou di Yanüari 2019 (FMR Yanüari 2019) mi a tuma nota ku te ainda Analytisch Diagnostisch Centrum NV no ta kumpliendo ku entrega nan kuenta anual 2017 na tempu na Gobièrnu di Kòrsou. A base di e lei di Corporate Governance i tambe statutonan di e kompanianan ariba menshoná mi ta aserka Minister di Salubridat, Medio Ambiente i Naturalesa ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 96 di Reglamentu di Orden di Parlamento di Kòrsou:

1. Kiko ta e motibunan konkreto ku Analytisch Diagnostisch Centrum NV segun e FMR Yanüari 2019 Bijlage 5, no a entrega su kuenta anual audita di aña 2017 na Gobièrnu di Kòrsou?
2. Ki dia Parlamento di Kòrsou lo risibí di Gobièrnu di Kòrsou e kuenta anual 2017 audita di Analytisch Diagnostisch Centrum NV?.

 

Atentamente,

Curtley Obispo

Parlamentario pa Kòrsou

PAR