Prome Minister Evelyn Wever-Croes: CU E eLEARNING PILOT PROJECT Pronto borchinan di krijt lo pasa pa pasado

Prome Minister Evelyn Wever-Croes:

 

CU E eLEARNING PILOT PROJECT

Pronto borchinan di krijt lo pasa pa pasado

 

Cu e vision di Parlamentario Edgard Vrolijk, diaranson, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Gobierno lo traha cu e eLearning Pilot Project den colaboracion cu e Scol Basico Cacique Macuarima na unda lo desaroya un programa di innovacion den un manera nobo y unico.

 

Prome Minister Evelyn Wever-Croes tawata presente na e lansamento di e Proyecto innovativo aki. E mainta aki, Prome Minister a wordo ricibi pa klas 1 te cu klas 6 di e Scol Basico Cacique Macuarima pa muchanan masha contento y entusiasma y na dado momento nan a dal e grito di indjan. Muchanan por a experimenta cu e tablets y ‘Virtue Reality Goggles’ y nan tur a keda hopi emociona pa ta e prome scol piloto na Aruba cu ta cuminsa cu e proyecto aki.

 

Prome Minister cu gran alegria a expresa cu borchinan di krijt pronto ta pasa pa pasado na Cacique Macuarima y lo wordo reemplasa cu e-boards como proyecto piloto di innovacion.

Cu e proyecto di e-Learning Cacique Macuarima, a traves di innovacion y digitalisacion lo stimula nos hobennan mas ainda. E proyecto lo keda cla pa e siguiente aña escolar.

 

Prome Minister a gradici tur cu a pone di nan banda pa realisa e proyecto aki pero specialmente colega di partido Parlamentario Edgard Vrolijk pa su idea y insistencia pa bin cu e proyecto aki. Un danki ta bay tambe na Minister Lampe, docentenan y Comision di Mayor.