Kòrsou a gana 3 medaya Carifta Junior Chess 2019

Ahedresistanan di Kòrsou a konkistá 3 medaya den e Carifta Junior Chess Championship 2019. Ailen Mena a kleim oro den kategoria femenino U20, miéntras ku Mariana Sanchez den kategoria femenino U18 i Frederic Simonis den mucha hòmber U12 a gana plata.

E di 8 edishon di Carifta Junior Chess Championship 2019 a resultá un éksito kompleto den Siman Santu ku partisipashon di un kantidat rèkòrt di 182 ahedresista hubenil for di 11 isla den Karibe. E kampionato a tuma lugá den Willemstad Room di Curaçao Hilton Resort na Piscadera.

Kòrsou su karta prinsipal den e kampionato hubenil di ahedres pa region di Karibe aki, tabata sin duda Ailen Mena. E kampion di Kòrsou i alabes maestro femenino di FIDE a tèrminá e kompetensia invikto ku 6 punto for di 7 partido. Ela gana 5 wega i hunga dos biaha remise (tabla).

Te ku buelta number 5 Ailen Mena tabata den un lucha tenas ku Ashanti Blackwood di Jamaica i tambe Mariana Sanchez di Kòrsou. Ganando su dos último weganan ayera djadumingu, ela kleim di forma indiskutí e tan kodisiá medaya di oro.

Ashanti Blackwood di Jamaica a tèrminá na di dos puesto tras di Ailen Mena ku 5,5 punto, miéntras ku Mariana Sanchez di Kòrsou a finalisá na di tres lugá ku 4,5 punto. E dos ahedresistanan aki sinembargo debí na nan edat i tambe segun reglamentu di kompetensia, no a figurá den ganadónan den U20 pero sí a bini na remarke pa respektivamente medayanan di oro i plata den grupo femenino U18.

Fuera di Ailen Mena i Mariana Sanchez, e ahedresista Frederic Simonis di Kòrsou tambe a saka kara. E talentoso ahedresista aki a konkistá plata den grupo di mucha hòmber U12. Ela tèrminá e di 8 edishon di Carifta Junior Chess Championship ku 6 punto. Kampion a sali Jaden Shaw di Jamaica ku 6,5 punto, miéntras ku Yannick Kartodikromo di Surnam a kaba ku 5,5 punto bon pa bròns.