Minister Xiomara Ruiz-Maduro ta informa: Aruba a wordo baha fo’i lista preto di Union Europeo E trabou a keda finalisa satisfactoriamente

Minister Xiomara Ruiz-Maduro ta informa:
Aruba a wordo baha fo’i lista preto di Union Europeo
E trabou a keda finalisa satisfactoriamente

ORANJESTAD – Durante reunion di e Ministernan di Finanzas di Europa na Brusselas diabierna ultimo, Aruba a wordo baha for di e lista preto di EU di Paisnan cu nan sistema fiscal ta fomenta un competencia cu no ta husto. E cambionan cu Aruba a haci recientemente na e leynan fiscal di nos Pais, ta cuadra cu e standardnan Europeo di e Organisacion pa Cooperacion y Desaroyo Economico OECD y esaki ta pone nos den e grupo di Paisnan cu leynan fiscal ‘EU compliant.’

Recientemente Aruba a wordo poni riba lista preto di EU debi cu algun cambio den nos leynan no a keda efectua promer cu 1 di januari 2019. E cambionan necesario den e leynan ‘Algemene Landsverordening Belastingen’ y e ‘Landsverordening winstbelasting’ a keda aproba pa Parlamento dia 4 di april y dia 10 di april e ‘Landsbesluit aanwijzing reële economische aanwezigheid transparante vennootschap’ tambe a keda decreta. Cu e cambio di e leynan aki y e decreto, Aruba a cumpli cu e cambionan necesario cu ta hiba cu awe nos ta cumpli cu tur e reglanan di EU.

Minister ta manda un palabra di gratitud na tur persona cu di un of otro manera tabata envolvi pa haci e cambionan aki un realidad. ‘Boso esfuerso grandi pa Aruba por mantene su bon nomber y reputacion ta wordo altamente aprecia’ ta palabranan di gratitud expresa pa e mandatario encarga.