RESUMEN DI SIMAN DI GABINETE WEVER-CROES

RESUMEN DI SIMAN DI GABINETE WEVER-CROES

13-18 mei 2019

 

* Premier Evelyn Wever-Croes hunto cu Premier di Corsou Eugene Rhuggenaath tabata na Washington pa reunionnan hunto, pa asina enfatisa e impacto severo di e crisis migratorio di Venezuela riba Aruba y Corsou. Un ‘joint mission’ exitoso den cual a estrecha lasonan entre Aruba, Corsou y Merca.

 

* E noticianan entorno e refineria no ta positivo, sinembargo Gobierno a institui un comision cu tin como tarea pa duna conseho riba (A) si ta sigui cu Citgo, y si no (B) ta busca otro operador, y si no (C) cual otro alternativa tin pa San Nicolas cu ta trece cupo di empleo y bienestar economico.

* Gobierno di Aruba a tuma despedida di sr. Gijs Baars, representante di Hulanda na Aruba y Gobierno a cera conosi cu David Abrahams cu ta bay reemplasa Gijs Baars na augustus.

* Diahuebs ultimo Gobierno a duna informacion tocante Venezuela y e refineria na Parlamento den un bijeenkomst y a contesta preguntanan di Parlamentarionan, demostrando asina cu transparencia den e proceso aki ta hopi importante.

* Un di e motibonan principal pa cual a pone e carteranan di infrastructura y medio ambiente hunto tabata pa crea e balansa entre nan dos. Gobierno a acerca e comision Flora y Fauna pa conseho riba e situacion sumamente lamentabel unda cu UTV’nan ta core den areanan di naturalesa y causa destruccion na nos medio ambiente / flora y fauna, y pa hunto cu DTI bin cu un plan con pa atende cu e situacion  aki.

 

* Gobierno a otorga na miembronan di e team di Directie Natuur en Milieu, nan Landsbesluit pa loke ta “toezichthouding” riba diferente ley cu DNM ta traha cu n’e! E paso aki ta importante pasobra pa hopi aña DNM a keda cu 1 toezichthouder solamente cual a haci hopi dificil pa controla y supervisa den diferente momento, awor e grupo ta bira 5 y lo funciona den forma mas eficiente na bienestar di naturalesa.

 

* E departamento encarga cu keurmento di auto di DTI a sali hunto cu KPA y DTP riba caya pa ehecuta control riba e vehiculanan riba caminda na diferente parti di e isla, cu ta saca dimas huma y tambe e condicion general di e vehiculo. Gasnan cu auto ta emiti ta daña calidad di aire y causa daño na medio ambiente.

 

* Bureau City Inspector ta activo rond Aruba pa remove autonan bieu y bandona for di acera den diferente bario y ta haci accion di limpiesa di diferente dump ilegal cu ta constata.

 

* Minister di Cultura a entrega certificado na e hobennan ganador di Arte di Palabra kendenan a declama e bunita poesia ‘Aruba’, como palabra di exito pa nan presentacion na e Competencia di Arte di Palabra ABC cu ta tuma luga dia 18 di mei na Corsou.

 

* Banco Central a lansa e serie nobo di placa di papel den presencia di e Presidente, Minister President y Minister di Finansa. E serie ta hiba e tema ‘Bida na Aruba’ y ta contene aspectonan di nos flora, fauna, herencia cultural, monumento y luganan importante na Aruba. Na comienso di juni e placa di papel nobo lo drenta den circulacion.

 

* Durante reunion di e Ministernan di Finansa di Europa na Brusselas diabierna ultimo, Aruba a wordo baha for di e lista preto di EU di Paisnan cu nan sistema fiscal ta fomenta un competencia cu no ta husto. E cambionan cu Aruba a haci recientemente na e leynan fiscal di nos Pais, ta cuadra cu e standardnan Europeo di e Organisacion pa Cooperacion y Desaroyo Economico OECD y esaki ta pone nos den e grupo di Paisnan cu leynan fiscal ‘EU compliant.’

 

* Minister di Finansa a entrega certificado na participantenan di e Business Week 2019 ‘Conquering New Horizons’ organisa pa Exprodesk di Departamento Economico. Durante e siman aki esnan activo den e industria creativo como exportadornan awo of den futuro, artistanan, artesanonan y dunado di servicio, a trata diferente tema practico pa yuda nan ta exitoso den nan negoshi. A trata e temanan di E-commerce y Online Payment, Belasting, Micro Financiamento y derechonan di propiedad intelectual. Cu esaki Gobierno kier stimula negoshi bou di e sector di Industria Creativo cu ta un di e seis sector prometedor pa diversifica nos economia.

 

* Den nomber di Gobierno, Minister Ruiz-Maduro tabata presente hunto cu colega Minister Lampe pa hiba discurso pa felicita e comunidad Haitiano residencia na Aruba cu nan celebracion di Dia di Creacion di Bandera di Haiti.

 

* Minister di Husticia a bishita e departamento nobo cu ta atende aplicacionnan di asilo. Den cuadro di e cantidad sin precedente di aplicacionnan di asilo, debi na e situacion na Venezuela, Gobierno di Aruba a crea, cu asistencia di IND, un unidad di como 10 persona, cu ta yuda atende y trata e aplicacionnan.

 

* Diaberna atardi Gobierno a ricibi un manifesto di un grupo preocupa referente e tema di abuso di menornan. A splica e pasonan concreto cu e Gobierno actual a tuma, entre nan e Crisisplan Social y cu entrante 1 di juni venidero e base legal pa entre otro e Meldcode lo drenta na vigor. Ademas entre otro lo aumenta castigo y lo introduci castigo minimo pa e tipo di delitonan aki. A palabra cu dentro di un siman lo duna un contesta riba e preocupacionnan expresa den e manifesto.

 

* Na Boneiro a tuma luga e Vierlanden Bestuurlijk Overleg riba tereno di Salubridad Publico. E reunion aki ta un reunion cu anualmente ta ser teni entre e mandatarionan di Aruba, Boneiro, Corsou y Sint Maarten, riba cooperacion entre e islanan, tambe riba e tereno di cuido curativo, cu lo bay stimula mas “medische uitzendingen” entre e cuatro islanan, tambe lo bay reconoce nos yiunan di tera cu a rekeri un of otro specialismo den region y asina duna nan e oportunidad pa traha den nan pais.

 

* Minister Dangui Oduber a anunicia oficialmente e prome edicion di Island Fest cu lo ta e festival cu lo remplasa Carrubean. Island Fest ta bay ta un evento cu un concepto ful diferente, cu iluminacion y cu hopi entretenimento y lo bay tuma luga entre e 3 cayanan riba e rotonde cu e strea. Cada caya lo bira un Island y lo tin su mesun tema, entretenimento, show, bar y cushina.

 

* Minister di Enseñansa a haya presentacion di e plan di implementacion di e proyecto scol saludabel door di e werkgroep.

 

* Minister di Enseñansa a haya presentacion di e plan di un cluster 2 klas pa muchanan cu deficiencia di oido door di fundacion Fepo.

 

* Minister di Enseñansa a organisa dos dia di reflexion guia pa un delegacion di SGB di Boneiro pa profesionalnan di SPO cu ta pa muchanan special.

 

* Minister di Enseñansa a tene un reunion di trabao cu representante di University of New Brunswick, Canada, den preparacion pa un MOU pa facilita cu nos studiantenan tin mas opcion na Canada.

 

* E siman aki Minister encarga cu Transporte a elabora extensamente riba San Nicolas Port Authorities and Development.

 

* Setar NV a entrega un cuanta anual positivo y no ta raportando perdida. Plannan futuro di Setar, na corto y largo plazo, ta mustra viable y sigur ta conta cu e respaldo absoluto di Gabinete Wever-Croes.

 

* Arubus a anuncia e Director nobo despues di un proceso di seleccion y escogencia extenso y riguroso entre 11 candidato cu a splica, cu a keda realisa pa un compania di afo dunando asina contenido na nos polisa di gobernacion pa loke ta transparencia. sr. Edwin Mohamed lo bira director di Arubus NV.

 

Cu e mesun dedicacion y conviccion nos lo drenta un siman nobo.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: