Advertisements

Lisensia pa “Post Spaar Bank, por funshoná komo un banko komersial sin e limitashon nan ku e aktual lisensia ta kontené i ku ta pone ku PSB no por sirbi interes bankario di yunan di tera

Willemstad, 20 di mei 2019

 

Na Presidente di Parlamento

Señor W. Millerson

P/a Wilhelminaplein # 4

PRESENTE

 

Tópiko: Lisensia pa “Post Spaar Bank, por funshoná komo un banko komersial sin e limitashon nan ku e aktual lisensia ta kontené i ku ta pone ku PSB no por sirbi interes bankario di yunan di tera

 

Señor Presidente,

Frakshon di Movementu Futuro Kòrsou (MFK) ke hasi uso di su derecho konforme artíkulo 64 di nos Reglamentu di Ordu (RvO) i ta aserka bo persona di pa yama un reunion públiko ku e punto di agènda ariba menshoná.

Frakshon di MFK a tuma nota ku últimamente ta reina hopi disgustu serka pueblo di Kòrsou pa e forma kon bankonan lokal a bin ta atendé ku nan. Diferente siudadano i komersiante a aserka nos frakshon, pa manifestá nan mal kontentu i pa mira di ki forma frakshon di MFK por yuda pa yega na un solushon.

Un di e kehonan prinsipal di esnan ku a aserka nos frakshon ta e echo ku gobiernu di Kòrsou (lesa Pais Kòrsou) ta dispone di un banko, kual ta PSB pero esaki no ta dispone di un lisensia pa e por funshoná komo un banko komersial sin limitashon. Frakshon di MFK a hasi su investigashonnan i nos a bin komprondé ku basta aña pasa PSB a entrega un petishon na “Centrale Bank van Curaçao en St. Maarten” (CBCS) pa haña e asina yama “Algemene Bank Vergunning”, pero nan petishon no a wòrdu honra te ku awe.

Frakshon di MFK ta lamentá ku no a otorgá e lisensia ariba menshoná na PSB. Informashon ku nos ta dispone di dje, ta asina ku PSB ta dispone di tur e infrastruktura ku ta nesesario pa funshoná komo un banko komersial i nos no ta mira motibu pa no otorgá PSB e lisensia. No ta un sekreto públiko ku bankonan lokal ta hasi ganashinan astronómiko i si konvertí PSB den un banko komersial, esaki lo tin benefisio pa kaha di gobiernu na momento ku PSB paga gobiernu dividendo.

Ta p’esei frakshon di MFK pa medio di esaki ta pidi Presidente di Parlamento invitá Minister di VVRP señora Zita Jesus-Leito i Minister di finansa señor Kenneth Gijsbertha pa ta presente durante di e reunion aki, pa asina Parlamento por debatí riba e tópiko aki i fiha un posishon ku ta benefisiá pueblo di Kòrsou i kaha di gobiernu.

 

Atentamente,

 

Gilmar Pisas Charles Cooper Gilbert Doran

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: