Skol Frater Evonius a finalisa nan praktika final

Skol Frater Evonius ta ubika na Koraalspecht. E ta un skol kaminda kada alumno ta tuma nan tempu pa desaroyá. Nan ta siňa segun e tèmpo ku nan tin mester pa yega e punto final (grupo 8).

Esaki tabata e kaso siman pasa dia 28 i 29 di mei, kaminda e alumnonan a eksperensha e parti final di práktika den kushina.

Nan mester a prepará un kuminda prinsipal i un pasaboka. Nan mester a traha den grupo di dos. For di mainta e alumnonan a kuminsá ke preparashon. Nan a tuma un pouze i atardi nan a regresá pa kuminsá kushina. Kada alumno a invitá 2 persona pa presensia nan eksperensha kulinario.

Tabata un anochi kulinario yena ku Pashon i AMOR riba tayo. Kada alumno a sabi di duna lo máksimo di nan, bou di guia di mr. Malcolm (Kushina), yuf.  Cori (Dosente di klas) i yuf. Meredith, (Kordinadó i asistente)

Un satisfakshon enorme tabata reina durante di e anochi. Pa mira kon e alumnonan a pone riba tayo nan talento “skondí” ku a wòrdu deskubrí durante e un aňa ku nan a pasa den kushina. Nos ta super orguyoso di nos alumnonan i ta deseá nan éksito den nan estudio avansá.