Stichting Eerste Haring Party Curacao 2019

 

Kòrsou, 6 di yuni 2019

“Stichting Haring Party Curacao” ta organisá riba djarason 12 di yuni próksimo e konosído “Curaçao Haring Party”. E evento aki ta tuma lugá den restorant “De Heeren”, ku situá den Zuikertuintje Mall i ta kuminsá 7’or di anochi.

Manera ta konosí, luna di yüni ta e luna di “Haring”, i aki na Kòrsou hopi persona den nos komunidat ta amante di e tipo di bokadillo aki. E evento “Curaçao Haring Party” ta un inisiativa di e konosido komersiante Hans Vrolijk (q.e.p.d), ku mas di  25 aña pasá a kuminsá organisá i promové e fiesta aki. “Stichting Haring Party Curacao” a sigui ku e tradishon aki, i djarason 12 di yuni lo tin e siguiente “Eerste Haring Party” na Kòrsou pa 2019.

Meta di e “Curaçao Haring Party” ta pa krea fondo ku ta bai pa organisashonnan di un karakter karitativo riba nos isla. E aña aki e entradanan ku ta ser generá dor di e evento ta bai pa “Fundashon Skol di Arte i Kultura Futuro Briante”. E fundashon aki, ku ta kai bou di maneho di señora Roselien Sabat ta desplegá un gran labor den komunidat pa guia muchanan ku ta bin di famianan di ménos rekurso. Entre otro e fundashon aki ku regular ta organisá kampamentu den fakansi pa e muchanan i tambe tin un tienda di paña situá na Seru Grandi 114A, kaminda famianan di ménos rekurso, pagando un suma simboliko por atkerí pañanan nobo.

Komunidat por kolaborá ku e kousa aki dor di kumpra un ticket pa e evento na balor di 100 florin i pa esaki e persona por disfruta di sufisiente haring henter anochi i tambe gosa di un open premium bar. Pa personanan ku no ta kome haring por disfrutá di pan stobá. Ticket ta optenibel na “De Heeren” of serka señor Fred Rabelin na telefòn 560-3140.

Pa por maksimalisá e donashon na  “Fundashon Skol di Artei Kultura Futuro Briante”, lo tin posibilidat pa hasi donashon i entrega pañanan ku no ta usa mas. Esakinan mester ta den bon estado si. Tambe “Stichting Haring Party Curacao” ta organisá un findishi di artikulonan hopi interesante, di kua tur e entradanan generá ta bai pa “Fundashon Skol di Arte i Kultura Futuro Briante”.  Durante e anochi lo tin músika di nos konosido artista lokal Wendy Jane, ku lo sòru pa un gran ambiente.

“Stichting Haring Party Curacao” ta spera koperashon di komunidat pa e gran kousa aki.

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: