Internashonal – Argentina i Uruguay ta sin koriente 

Un fayo elektriko masivo a pone ku Argentina i Uruguay ta sin koriente for di 7or di mainta. Na tur ta mas o menos 48 miyon hende ku ta afektá. Entre e areanan afektá di Argentina tin Santa Fe, San Luis, Formosa, La Rioja, Chubut, Cordoba i Mendoza. Tierra del Fuego ta e uniko area ku tin suministro di koriente. E efekto di koriente ta kore for di Buenos Aires pa Mendoza pa Comodoro Rivadavia komo e  areanan ku a keda afektá. Tin un parti di Buenos Aires ku tin koriente i dos aeropuerto den e kapital ta funshoná pa medio di generator. Un di e kompanianan di suministro di awa di mas grandi na Argentina, Agua y Saneamientos Argentinos, a kuminsá atvertí pa limitá uso di awa, komo ku distribushon di awa pa bebe a keda afektá pa e kitamentu di koriente. Na Uruguay e kompania di koriente a duna di konosé ku e areanan na kosta tin suministro di koriente atrobe. Ta kalkulá ku parti di e suministro por keda establesé den shete pa ocho ora.